Ky është vlerësimi i deputetes gjermane për hapjen e negociatave BE-Shqipëri

Deputetja socialdemokrate gjermane, Nezahat Baradari, ka dhënë një vlerësim pozitiv lidhur me hapjen e negociatave BE-Shqipëri.

Deputetja socialdemokrate gjermane e Bundestagut, Nezahat Baradari, ka vlerësuar si hap të rëndësishëm hapjen e negociatave të anëtarësimit me Shqipërinë dhe Maqedoninë e Veriut. “Të dyja vendet kanë bërë përpjekje të mëdha për reforma dhe me këtë i kanë përmbushur kushtet për fillimin e negociatave. Për vazhdimin e kësaj dinamike të reformave negociatat e anëtarësimit do të ishin një motor vendimtar”, është shprehur Baradari për Deutsche Wellen.

Sipas deputetes socialdemokrate, Baradari, Bundestagu përfundimisht duhet të hapë rrugë për fillimin e bisedimeve të anëtarësimit. “Me kushtet paraprake të formulurara për Shqipërinë dhe fokusimin në kapitujt e shtetit ligjor në negociatat e pranimit, do të duhej mënjanuar të gjitha pengesat që i zinin rrugën miratimit”, ka thënë ajo.

Partia Socialdemokrate Gjermane e mbështeti edhe në qershor hapjen e negociatave të anëtarësimit me Shqipërinë. Kurse unioni CDU/CSU pritet që këtë javën të merret intensivisht me Shqipërinë, në kërkim të një qëndrimi për çeljen e negociatave, përcjell albinfo.ch.

---