Ky është ministri i Diasporës

Dardan Gashi përveç që është zgjedhur zëvendëskryeministër i Kosovës është zgjedhur edhe ministër i Diasporës

Të shtunën mbrëma Ramush Haradinaj është zgjedhur kryeministër i Kosovës, derisa është votuar edhe kapiteni qeveritar.

Dardan Gashi përveç që është zgjedhur zëvendëskryeministër i Kosovës është zgjedhur edhe ministër i Diasporës, shkruan albinfo.ch.

Por, cila është historia e tij? Ai ka qenë ministër i Mjedisit dhe Planifikimit Hapësinor.

Gashi u lind në Kosovë, më 3 korrik, 1969. Ai u zhvendos në Vjenë, Austri, ku kreu studimet e Shkencave Politike dhe Komunikimit në Universitetin e Vienës. Karrierën e tij e filloi si mbikëqyrës i zgjedhjeve me OSBE’në, Misioni në Bosnje e Hercegovinë. Në vitin 1997, Gashi u bë zyrtar i zgjedhjeve, drejtor i zyrës në terren në Federatën e Bërckës. Gjatë atij viti, ai u zhvendos në Kroaci, me pozitën e monitoruesit të të drejtave të njeriut, dhe përgjatë vitit të ardhshëm lëvizi nëpër vendet ballkanike, si pjesë e misioneve të OSBE-së.

Gashi ka punuar në Misionin Verifikues, si Zyrtar për Informim i Zyrës Ndërlidhëse të Sekretariatit të OSBE-së në Vjenë. Pas luftës, ai vazhdoi punën me OSBE, dhe dha kontributin e tij në planet e ndërtimit të institucioneve, politikave mediale, regjistrimit të popullsisë dhe zgjedhjeve elektorale.

Gjatë vitit 2000, Gashi punoi në Grupin Ndërkombëtar të Krizave, Tribunalin e Hagës për krime në Ish-Jugosllavi, Iniciativën Evropiane për Stabilitet, etj.

Nga viti 2005 deri më 2008, z. Gashi vazhdoi karrierën e tij politike në zyrën e zëvendës kryeministrit/Ministria e Administrimit të Pushtetit Lokal. Fillimisht, ai kryesoi grupin punues për decentralizim, dhe mori pjesë në të gjitha takimet gjatë Negociatave të Vjenës, si këshilltar i lartë. Njëkohësisht, ai kryesoi edhe grupin punues të Kthimit përbrenda procesit të Dialogut të drejtpërdrejt me Beogradin.

Në qershor të vitit 2010, Gashi u bë zëvendësministër i Integrimeve Evropiane. këtë pozitë e mbajti deri në janar 2011, kur emri i tij u propozua për Ministër të Mjedisit dhe Planifikimit Hapësinor, pas zgjedhjeve kombëtare të vitit 2010.