Kuvendi ratifikon 6 marrëveshje ndërkombëtare

Grupet parlamentare kanë shprehur mbështetjen e tyre, duke thënë se këto marrëveshje janë në interes të shtetit të Kosovës

Kuvendi i Kosovës ka ratifikuar në seancën djeshme plenare gjashtë marrëveshje ndërkombëtare.

U miratuan, marrëveshjet si më poshtë: për financim dhe grante ndërmjet Qeverisë së Republikës së Kosovës dhe Bankës Botërore e 11 marsit 2011; Marrëveshja mes Qeverisë Republikës së Kosovës dhe UNCTAD (Agjenci e specializuar e Kombeve të Bashkuara) për projektin softueri ASYCUDA; Marrëveshja për financimin e projektit për regjistrimin e pasurisë së patundshme dhe kadastër mes Qeverisë Republikës së Kosovës dhe Shoqatës ndërkombëtare për zhvillim; Marrëveshja mes Qeverisë Republikës së Kosovës dhe Kfw Frankfurt am Main dhe Kompanisë së Ujësjellësit Regjional-Prishtina; Marrëveshja ndërmjet Qeverisë së Republikës së Kosovës dhe Qeverisë së Dukës të Madh të Luksemburgut dhe Marrëveshja për financimin e projektit për modernizimin e sektorit publik mes Qeverisë Republikës së Kosovës dhe Shoqatës ndërkombëtare për zhvillim.

Ministri i Financave, Badri Hamza ka theksuar se këto marrëveshje do të ndikojnë në përmirësimin e mirëqenies së jetës së qytetarëve të Kosovës, ndërkaq edhe grupet parlamentare kanë shprehur mbështetjen e tyre, duke thënë se këto marrëveshje janë në interes të shtetit të Kosovës.

“Këto marrëveshje nuk i dedikohen ndonjë subjekti politik, ndonjë institucioni, por gjithë qytetarëve të Kosovës. Andaj është shumë i rëndësishëm ratifikimi tyre, sepse do të ndikojnë në përmirësimin e kualitetit të jetës të të gjithë qytetarëve të Kosovës, do të ndikojnë në transparencën, qeverisjen e mirë dhe hapjen e mundësisë për bashkëpunim në të ardhmen me këto institucione ndërkombëtare”, ka thënë Hamza.