Kurz: Nuk ka arsye për shqetësim nga deklarata e Strache për Kosovën, Ballkani perëndimor është prioriteti ynë

Ballkani Perëndimor do jetë një nga prioritet e Bashkimit Europian, gjatë mandatit të presidencës austriake, gjysmën e dytë të këtij viti, tha kancelari Sebastian Kurz, gjatë ditës së sotme në Vjenë, njofton albinfo.ch. Bile bërthama e këtij prioriteti do jetë “afrimi” mes Beogradit dhe Prishtinës.

“Austria do kontribuojë në dialogun mes dy palëve,” tha Kurz përpara parlamentit. Në lidhje me deklaratën kontestuese të zv.kancelarit Heinz Strache se “Kosova është pjesë e Serbisë”, Kurz shtoi: “Nuk ka arsye për shqetësim nga ajo deklaratë.”

Momentalisht qeveria austriake është mes të djathtëve të OVP dhe ekstremit të djathtë FPO, kjo e fundit shquhet për deklarata kontraverse në mbështetje të nacionalizmit serb.

“Austria akoma ka imazhin e mirë në rajon (Ballkanin perëndimor),” duke shtuar se deklarata e Strache më shumë solli habi në opozitën austriake sesa në Beograd dhe Prishtinë. Kurz vijoi të mbrojë idenë e mbylljes së Korridorit Ballkanik për refugjatët.