Kurti tregon se çfarë bisedoi me Jovanoviqin

Kryetari i Lëvizjes Vetëvendosje, Albin Kurti, është takuar me politikanin serb, Çedomir Jovanoviq.

Sipas Kurtit, takimi me kryetarin e Partisë Demokratike Liberale në Serbi është zhvilluar në Prishtinë, përcjell albinfo.ch.

Kurti tregoi se çfarë ka biseduar me të. “Diskutuam për raportet midis Kosovës e Serbisë, zhvillimet politike dhe gjendjet socio-ekonomike në vendet tona, situatën në rajon dhe sfidat e integrimit evropian. Biseduam edhe për të kaluarën, për lëvizjet studentore, luftërat në ish Jugosllavi dhe plagët e hapura në Ballkan. Çedomir Jovanoviq ka luajtur rol vendimtar në dërgimin e Milosheviqit në Hagë, si dhe në arrestimin fillestar të Jovica Stanishiqit dhe Frenki Simatoviqit”, ka shkruar Kurti në rrjetet sociale.

Çedomir Jovanoviq është ndër politikanët e rrallë në Beograd i cili haptazi e thotë se Kosova është e pavarur dhe se shteti serb duhet ta pranojë këtë fakt.