Kurti njofton deputetët e Parlamentit të Austrisë për kidnapimin e 3 policëve

Kryeministri i vendit, Albin Kurti, ka pritur një delegacion shumëpartiak të deputetëve të Parlamentit të Austrisë, anëtarë të Grupit Parlamentar të Miqësisë me Kosovën, të shoqëruar nga ambasadori i Austrisë në Kosovë, Christoph Weidinger.

Sipas komunikatës së qeverisë, ky takim i shërben fuqizimit dhe sinkronizimit të marrëdhënieve ndërmjet dy shteteve, prandaj e pranishme në të ishte edhe nënkryetarja e Grupit Parlamentar të Miqësisë me Austrinë në Kuvendin e Kosovës, deputetja Tinka Kurti.

Kryeministri Kurti, sipas komunikatës, ka falënderuar deputetët austriakë për vizitën dhe i ka njoftuar me qeverisjen dyvjeçare dhe mbi zhvillimet e fundit.

Tutje, sipas komunikatës, sa i përket situatës në veri, kryeministri Kurti tha se ajo është e vështirë për shkak të Serbisë.

“E cila të mërkurën kreu akt agresioni mbi Kosovën, kur njësitë ushtarake e policore të Serbisë rrëmbyen tre policë të Kosovës në brendi të territorit të Republikës së Kosovës, me ç’rast ndau me ta dëshmitë që tregojnë qartë shkeljen e sovranitetit dhe integritetit territorial të vendit, të bëra publike në konferencën e përbashkët me ministrin Sveçla”, thuhet aty.

Në lidhje me ngjarjen e ditës së mërkurë, Kurti ka shtuar se faktori ndërkombëtar duhet të reagojë dhe ta dënojë ashpër sjelljen dhe veprimin e Serbisë, duke i ftuar edhe deputetët që ishin prezentë, dhe të kërkohet lirimi i menjëhershëm dhe pa kushte i tre policëve nga Kosova.