Kurti kritikon 6 deputetë të LDK-së për qëndrimin ndaj kandidaturës për president

Kryetari i Lëvizjes Vetëvendosje, Albin Kurti, ka reaguar pas deklarimeve të gjashtë deputetëve të Lidhjes Demokratike të Kosovës se nuk do ta mbështesin kandidaturën e Bedri Sejdiut për president.

Pas një takimi me grupin parlamentar të LVV-së, Kurti deklaroi se të gjithë deputetët e partisë së tij kanë shprehur mbështetje për kandidaturën e Sejdiut.

Ai tha se fillimisht ishte shpresëdhënës qëndrimi i kryesisë së LDK-së për ta mbështetur kandidaturën, por situata, sipas tij, ndryshoi pas deklarimit të gjashtë deputetëve.

“Mbështetja ishte e plotë nga të gjithë deputetët e grupit tonë parlamentar për profesor Bedri Sejdiun si president të ardhshëm”, deklaroi Kurti.

Sipas tij, nga 18 deputetët që ka LDK-ja, gjashtë prej tyre kanë bërë të ditur se nuk do ta votojnë Sejdiun.

Kurti paralajmëroi se pas këtij zhvillimi mund të ketë takime të reja me kryetarin e LDK-së, Lumir Abdixhiku, ose diskutime brenda strukturave të Vetëvendosjes, me qëllim të përcaktimit të hapave të mëtejshëm.

Ai e cilësoi qëndrimin e gjashtë deputetëve si “të papërgjegjshëm” dhe “absurd”, duke argumentuar se një situatë e tillë mund ta çojë vendin drejt zgjedhjeve të reja.

Sipas Kurtit, Kosova mund të përballet me zgjedhje për herë të katërt brenda dy vitesh, nëse nuk arrihet një marrëveshje për zgjedhjen e presidentit.