Kosova

Kurti: Gjatë kësaj jave, Kosova nënshkroi marrëveshje me KfW, Qeverinë e Zvicrës dhe Bankën Botërore

Kryeministri i Kosovës, Albin Kurti, ka thënë se vetëm gjatë kësaj jave, Kosova nënshkroi marrëveshje me KfW, Qeverinë e Zvicrës dhe Bankën Botërore.

“Këto marrëveshje përfshijnë 61 milionë euro për një park të energjisë diellore, 9 milionë euro për të rritur efikasitetin e ujësjellësit dhe 9 milionë euro për riparimet e ujitjes për të mbështetur fermerët. 79 milion euro të ndara në vetëm një javë për zhvillimin e Kosovës”, ka shkruar ai në rrjetin social “Twitter”, përcjell albinfo.ch.

Në anën tjetër, përmes një postimi në “Facebook”, ai u shpreh se sot siguria energjetike është siguri kombëtare, ndërsa sipas tij, Kosova ka kapacitete prodhuese të kufizuara që i takojnë shekullit të kaluar e që nuk janë investuar me dekada.

Ndër të tjera, ai u shpreh se energjia elektrike është interes kombëtar, teksa ka thënë se importimi i saj është shumë i shtrenjtë, sidomos gjatë sezonit të dimrit.