Kurti flet për tërheqjen e trupave austriake nga Kosova

"Kemi nevojë për më shumë prezencë të KFOR-it në Kosovë"

Kryeministri Kurti në një intervistë për televizionin publik austriak është pyetur për vendimin e Austrisë për heqjen e trupave të KFOR-it në Kosovë, përcjell albinfo.ch.

“Në prill, Austria do të tërheqë gjysmën e trupave që i ka në Kosovë në kuadër të KFOR-it. A jeni të zhgënjyer?”, e pyeti gazetari.

Kurti u përgjigj, duke thënë se është falënderues për rolin e Austrisë për Kosovën, derisa shtoi se vendimi i Austrisë për heqjen e trupave është sovran.

Sipas tij, Kosova dhe KFOR-i do të kenë nevojë në të ardhmen për njëri- tjetrin, përveçse të jenë pjesë e historisë së njëra-tjetrës.

“Ajo për çka kemi nevojë është më shumë trupa ushtarakë të KFOR-it, të cilët do të patrullonin me policinë tonë në kufirin me Serbinë. Ne kemi nevojë për më shumë kapacitete, ne kemi nevojë për më shumë prezencë të KFOR-it, por kemi nevojë edhe për programin për partneritet për paqe me NATO-n. E falënderoj Republikën e Austrisë, ushtarët, oficerët, gjeneralët që kanë shërbyer në Kosovë. Është vendim sovran i Republikës së Austrisë, por unë besoj që Kosova dhe KFOR-i kanë nevojë për njëri-tjetrin në të ardhmen, përveçse të jenë pjesë e historisë së njëri-tjetrit”, tha ai.

---