Kur mund të shkurtohet koha e fluturimit me aeroplan nga Kosova në shtetet e BE-së e anasjelltas

(AP Photo/Gene J. Puskar)

Rreth 30 minuta pritet të shkurtohet koha e fluturimit me aeroplan nga Kosova në shtetet e BE-së e anasjelltas. Kjo në rast të hapjes së korridorit ajror me Shqipërinë.

Kjo do të ndikonte edhe në uljen e çmimit të biletave, theksoi për rel Albion Idrizi, magjistēr i aviacionit.

Marrëveshja me Shqipërinë, për ta shfrytëzuar korridorin ajror të këtij vendi, është arritur në vitin 2020.

Kjo marrëveshje ka paraparë hapjen e dy pikave koordinuese ajrore, Kukad dhe Arbër, por nuk është zbatuar kurrë.

Sipas Autoritetit të Aviacionit Civil të Kosovës (AAC), i cili menaxhon hapësirën e ulët ajrore të vendit, marrëveshja nuk është zbatuar për shkak të disa procedurave teknike që është dashur të miratohen nga Shqipëria dhe misioni i NATO-s në Kosovë, KFOR, përcjell albinfo.ch.

Bujar Ejupi, drejtor i përgjithshëm i AAC-së, thotë se KFOR-i, këtë muaj, e ka dhënë lejen për shfrytëzimin e pikave Kukad dhe Arbër, dhe se ato pritet të lëshohen në shfrytëzim “së shpejti”.

KFOR-i, i cili është përgjegjës për sigurinë e hapësirës ajrore të Kosovës, ka konfirmuar se “ka miratuar mundësinë e hapjes së korridoreve ajrore ndërmjet Kosovës dhe Shqipërisë”, por nuk jep shumë detaje.