Kuqezinjtë përballë Andorrës, ja si pritet të luajnë pa Panuccin

Shqipëria sonte është mysafire e Andorrës, në takimin që fillon nga ora 20:45

Pas shkarkimit të Christian Panuccit, sot, Kombëtarja shqiptare është mysafire e Andorrës në takimin që fillon nga ora 20:45, shkruan albinfo.ch.

Kuqezinjtë do të drejtohen nga Ervin Bulku dhe Sulejman Mema. Para ndeshjes ka folur edhe kapiteni Elseid Hysaj. “S’duhet të mendojmë për trajnerin dhe gjërat që kanë ndodhur. Duhet të koncentrohemi për ndeshjen me Andorrën sepse na duhen patjetër tri pikët”, tha Hysaj.

“Panucci? Duhet të vazhdojmë para dhe ti fitojmë ndeshjet që kemi. Sigurisht jemi mërzitur se kemi kaluar çaste të mira për të, por duhet të ecim para. Situatë është shumë emirë sepse për një ndeshje të humbur, s’duhet të dënohemi për ato të radhës. Ndeshja me Andorrën do të na ndihmojë të harrojmë atë që ka ndodhur. Kemi marrë veten nga humbja me Turqinë dhe jemi gati për ndeshjen me Andorrën”, përfundoi Hysaj.

Trajneri Bulku theksoi rëndësinë e sfidës dhe kërkoi nga skuadra që të japë maksimumin për të dalë me tre pikë. “Unë jam pranë skuadrës dhe e njoh mirë grupin, ndaj edhe më takonte të marr një përgjegjësi të tillë, ndonëse jam një trajner i ri. Sfida me Andorrën është shumë e rëndësishme dhe ne duhet të fitojmë, që të mund të mendojmë për objektivin tonë. Eliminatoret sapo kanë filluar dhe kemi humbur vetëm ndeshjen e parë, ndaj të përqendrohemi te sfida ndaj Andorrës”, theksoi Bulku.

Formacioni i mundshëm: Berisha, Hysaj, Gjimshiti, Ismajli, Veseli, Basha, Grezda, Kaçe, Xhaka, Uzuni, Sadiku.

---