Kthimi i pronave nga ish- Jugosllavia ka mbetur në letër

Në bazë të një dokumenti, në republikat e ish-Jugosllavisë gjenden 172 prona të ndërmarrjeve shoqërore të Kosovës

Institucionet e Kosovës ende nuk kanë bërë asgjë në këtë drejtim, përveç që kanë formuar një komision. Themelimin e këtij komisioni e kanë bërë Ministria e Punëve të Jashtme dhe Agjencia Kosovare e Privatizimit.

Këto dy institucione janë bërë bashkë në këtë komision për t’i identifikuar pronat e ndërmarrjeve shoqërore që gjenden tash në shtetet e dala nga shthurja e ish-Jugosllavisë.Janë gjithsej 55, Ndërmarrje Shoqërore që kanë më tepër se 155 asete në republikat e ish-Jugosllavisë, bënë të ditur AKP-ja.

Kurse, në bazë të një dokumenti, në republikat e ish-Jugosllavisë gjenden 172 prona të ndërmarrjeve shoqërore të Kosovës. Sipas kësaj liste, më se shumti prona të ndërmarrjeve kosovare ka në Serbi, ku janë gjithsej 104, pastaj në Mal të Zi 42, në Bosnjë e Hercegovinë 15, në Kroaci 6, në Maqedoni 4 dhe në Slloveni 1.

Zëdhënësi i Ministrinë e Punëve të Jashtme, Artan Behrami, ka theksuar se institucionet e Kosovës kanë filluar përgatitjet për të kërkuar kthimin e pronave që i takojnë në bazë të legjislacionit, por edhe praktikave demokratike.

“Institucionet kompetente kanë bërë identifikimin e shumicës së pronave dhe ndërmarrjeve shoqërore të Kosovës, si dhe jemi në proces të identifikimit të pronave të tjera eventuale të Kosovës në ish-republikat jugosllave”, ka bërë të ditur ai.

Të njëjtën gjë e kanë thënë edhe zyrtarë të Agjencisë Kosovare të Privatizimit.

“Sipas të dhënave që ekzistojnë në Agjencinë Kosovare të Privatizimit janë 55 Ndërmarrje Shoqërore që kanë më tepër se 155 asete në republikat e ish- Jugosllavisë”, tha Ylli Kaloshi, zyrtar i lartë për marrëdhënie me publikun dhe media në AKP./lajm&albinfo/