Kthehen kolonat në kufirin Kosovë – Serbi

Bashkatdhetarët po duhet të presin nga 5-6 orë në hyrje të Kosovës. Pritjet me orë të tëra i ka konfirmuar edhe Policia e Kosovës

Ardhja e mërgimtarëve në Kosovë, sidomos gjatë ditëve të fundit, ka kthyer nëpër kufij kolonat e gjata. Bashkatdhetarët po duhet të presin nga 5-6 orë në pikëkalimin e Merdades dhe të Dheu i Bardh për të hyrë në Kosovë. Pritjet me orë të tëra i ka konfirmuar edhe Policia e Kosovës.

Zëdhënësi i Policisë së Kosovës, Baki Kelani ka thënë për REL, se këto pritje janë si rezultat i fluksit të madh të qytetarëve të Kosovës që jetojnë jashtë shtetit e që  pushimet vinë t’i kalojnë në vendlindje.

“Është më se evidente dhe e vërtet që bashkatdhetarët tanë që vinë në sezon të verës për pushime në Kosovë, kryesisht në muajin korrik dhe gusht, krijohen pritje të gjata në vendkalimet kufitare në Merdar dhe te Dheu i Bardhë. Këto pritej vinë si rezultat i frekuentimit dhe numrit të madh të automjeteve  në drejtim të Kosovës”, deklaron Kelani.

Autoritetet e Kosovës vazhdimisht kanë potencuar se do të marrin masa që t’i evitojnë këto pritje, mirëpo për çdo vit mërgimtarët ballafaqohen me të njëjti shqetësim.

“Frekuentimi i madh i automjeteve dhe procedurat që bëhen nga pala serbe po krijojnë kolona të gjata ne pika kalimet kufitare. Ne si Polici e Kosovës i informojmë bashkatdhetarët me pritjet që po ndodhin në Kosovë dhe iu apelojmë atyre që t’i shfrytëzojnë edhe pikat tjera kufitare”, tregon Kelani.

Ministri në detyrë i Diasporës, Ibrahim Makolli ka marrë një numër të madh ankesash nga bashkatdhetarët. Ai tha se këto pritje nuk po ndodhin vetëm në kufirin Kosovë-Serbi, por edhe në kufijtë e tjerë në atë Hungari-Serbi.

“Këtë çështje e kam biseduar disa herë edhe me përgjegjësit e EULEX-it, por edhe me policinë kufitare të Kosovës dhe kam parë vetë që këto radhë nuk krijohen si rezultat i neglizhencës apo mos veprimit të autoriteteve të Kosovës, por si rezultat i procedurave që kërkohen në kufirin e Serbisë, por shumë herë kemi edhe arsyetime nga më të ndryshmet nga pala serbe, siç është ka rënë sistemi apo çështje tjera që zakonisht arsyetohen ata”, thotë Makolli.

Ndryshe, sipas Marrëveshjes për Menaxhimin e Integruar të Kufirit, ndërmjet Kosovës dhe Serbisë janë gjashtë pikëkalime kufitare, dy janë në veri, Pika 1 dhe 31 (Leposaviq dhe Zubin Potok) dhe pikëkalimi në Merdar, Dheu i bardh, Mutiovodë dhe Muçiabë.

Policia u ka rekomanduar bashkatdhetarëve që t’i shfrytëzojnë edhe pikat tjera kufitare, kryesisht atë të Mutivodës dhe të Muçibabës.