Kryetari i LDK-së në Gjenevë: Kosova është e zbrazur, izoluar dhe e sanksionuar

Foto FB: Lumir Abdixhiku

Kryetari i Lidhjes Demokratike të Kosovës, Lumir Abdixhiku në shënimin e 34-vjetorit të veprimtarisë politike të këtij subjekti në Zvicër, ka mbajtur tubim me mërgimtarë në Gjenevë.

Gjatë këtij takimi, Abdixhiku e ka cilësuar Kosovën si të zbrazur dhe të sanksionuar, për tri vjetët e qeverisjes së kryeministrit aktual, Albin Kurtit, transmeton albinfo.ch.

Sipas tij, qytetarët janë mashtruar.

“Le ta themi qartë e zëshëm, Kosova pas tre vjetëve e gjysmë qeverisje është e izoluar, është e sanksionuar, është në zbrazje e zvogëlim popullsie, është pa investime, është pa perspektivë arsimore, shëndetësore e ligjore. Para një zymtësie e një trishtimi të tillë, patriotët e mëdhenj, të djathtit e mëdhenj nuk mund të qëndrojnë spektatorë”, ka thënë ai.

Tutje, ai ka thënë se LDK-ja ka pranuar mbështetje deri në fitoren e madhe të së djathtës shqiptare.

“Le t’i japim vetes një familje të fortë politike, e t’i japim Kosovës, fëmijëve tanë, e gjeneratave të tjera një të ardhme euroatlantike”, ka shtuar ai.