Kryesimi i OSBE-së nga Zvicra, lajm i mirë për Kosovën

Zëvendëskryeministri Kuçi e ka uruar ambasadorin Studman për marrjen e kryesimit të OSBE-së nga Zvicra, duke e vlerësuar këtë si lajm të mirë për Kosovën

Zëvendëskryeministri dhe ministri i Drejtësisë, Hajredin Kuçi e ka uruar ambasadorin  Gerard Studman për marrjen e kryesimit të OSBE-së nga Zvicra, duke e vlerësuar këtë si lajm të mirë për Kosovën dhe për mundësin e thellimit të bashkëpunimit ndërmjet dy vendeve.

Zëvendëskryeministri Kuçi e ka vlerësuar lartë punën që ka bërë Organizata për Siguri dhe Bashkëpunim Evropian në fushën e drejtësisë, në veçanti në promovimin e lirive dhe të drejtave të njeriut, me thekës te veçantë të minoriteteve.

Këto komente Kuçi i bëri gjatë një takimi që zhvilloi me ambasadorin e OSBE-së për Ballkanin Perëndimorë, Gerard Studman, me të cilin ka biseduar për bashkëpunimin në mes të institucioneve të Kosovës dhe OSBE-së.

Ministri Kuçi ka falënderuar ambasadorin Studman për mbështetjen që ka dhënë OSBE-ja gjatë zgjedhjeve lokale të vitit 2013 në Kosovë dhe ka shprehur gatishmërinë për thellim të bashkëpunimit edhe në fusha tjera.

Ndërsa diplomati zviceran shprehu vlerësimin e tij për bashkëpunimin që OSBE-ja ka me institucionet e Kosovës dhe gatishmërinë e thëllimit të këtij bashkëpunimi edhe në fusha tjera në të ardhmen.