Kryeministri i Kosovës: Milan Radoiçiq është arsyeja thelbësore e sulmeve në Kosovë

Kryeministri i Kosovës, Albin Kurti, në një konferencë për media, sot i ka bërë thirrje bashkësisë ndërkombëtare t’i bëjë trysni Serbisë ta dorëzojë tek autoritetet kosovare Milan Radoiçiqin, duke thënë se politikani dhe biznesmeni serb është “arsyeja thelbësore” e sulmeve që kanë ndodhur dhe mund të ndodhin në të ardhmen në Kosovë.

Sipas tij, problemi kryesor për bindjen e tij është fakti që Millan Radoiçiqi nuk dorëzohet nga autoritetet serbe te ato të Kosovës, transmeton albinfo.ch.

Kurti ka deklaruar se sikur Radoiçiq të mos lihej i lirë në Serbi, do të binin gjasat në mënyrë drastike që të realizoheshin të gjitha këto sulme që kanë ndodhur dhe sulmet në të ardhmen që ata i planifikojnë.

“Ne kërkojmë prej faktorëve ndërkombëtar t’i bëjnë trysni Beogradit ta dorëzojnë kryekriminelin Radoiçiq tek institucionet e Kosovës. Nëse Serbia ka dyshim se Radoiçiq nuk do të kishte gjykim të drejtë në Kosovë, ne e kemi EULEX-in, ai i vëzhgon të gjitha rastet në Kosovë. Prandaj ai duhet t’i dorëzohet Kosovës”, tha ai.