Kreu i Listës Serbe në Beograd: QUINT-i na kërkon ta njohim Kosovën

Goran Rakiq tha se gjatë takimit të së hënës ambasadorët e shteteve të QUINT-it kanë kërkuar nga kryetarët e komunave me shumicë serbe në Kosovë që ta pranojnë realitetin, e ai realitet është se Kosova është e pavarur

Gjatë një takimi të mbajtur më 15 gusht, ambasadorët e shteteve të QUINT-it i kanë kërkuar Listës Serbe që ta njohë pavarësinë e Kosovës. Kryetari i Listës Serbe, Goran Rakiq, këtë qëndrim të QUINT-it e paraqiti në një konferencë për media në Beograd, pas takimit të kryetarëve të komunave në veri të Kosovës dhe drejtorit të të ashtuquajturës Zyrë për Kosovën në Qeverinë e Serbisë.

Rakiq tha se gjatë takimit të së hënës ambasadorët e shteteve të QUINT-it kanë kërkuar nga kryetarët e komunave me shumicë serbe në Kosovë që ta pranojnë realitetin, e ai realitet është se Kosova është e pavarur, përcjell Albinfo.ch.

“Në takimin që zgjati më shumë se dy orë, kryetarët e komunave i njoftuan ambasadorët për problemet që kanë në komuna. Mesazhi kryesor që dëgjuam nga ambasadorët ishin se shtetet e tyre e njohin pavarësinë e Kosovës. Ne gjithashtu dëgjuan se ata i mbështesin në mënyrë absolute vendimet e marra nga Prishtina. Veçanërisht ata nënvizuan se mbështesin vendimet e Prishtinës për targat dhe dokumentin për hyrje-dalje që do t’u lëshohet serbëve me të hyrë në Kosovë”, tha Rakiq.

Kreu i Listës Serbe tha se janë dakorduar që të mos bëhen publike detajet e takimit me ambasadorët e QUINT-it, por theksoi se për shkak të peshës dhe seriozitetit të mesazhit që morën dje, ka përgjegjësi politike për t’i informuar qytetarët serbë që jetojnë në Kosovë.

Kujtojmë se në shtetet e QUINT-it bëjnë pjesë Shtetet e Bashkuara të Amerikës, Mbretëria e Bashkuar, Gjermania, Italia e Franca, dhe që të gjitha e njohin pavarësinë e Kosovës të shpallur më 17 shkurt 2008./Albinfo.ch

---