KQZ thotë se gaboi, diferenca ngushtohet në 237 vota

Diferenca pas këtij përmirësimi ka rënë në 237 vota, kurse më herët ishte 307 vota

Komisioni Qendror i Zgjedhjeve me anë të një njoftimi për media ka bërë të ditur se dëshiron të sqarojë të gjithë qytetarët e Republikës së Kosovës lidhur me një gabim teknik, që është bërë gjatë futjes së të dhënave të Rezultateve Preliminare, pasi është përmbyllur numërimi në Vendvotim.

“Në Vendvotimin 1921X/01R dhe në Vendvotimin 1921X/02R në komunën e Prishtinës, gjatë futjes së të dhënave të Rezultateve Preleminare janë shënuar gabim të dhënat të cilat më pas janë transmetuar në faqen zyrtare të KQZ-së, tek linku i Rezultateve Preliminare (Jo-Përfundimtare). Ky gabim është përmirësuar dhe do të paraqitet në linkun e rezultateve në faqen e KQZ-së”, thuhet në njoftimin për media të KQZ-së, përcjell albinfo.ch.

Diferenca pas këtij përmirësimi ka rënë në 237 vota, kurse më herët ishte 307 vota.

Avdullah Hoti nga LDK-ka ka kërkuar që votat të rinumërohen në Prishtinë, derisa Dardan Sejdiu, është shprehur se kot e kanë, pasi VV-ja do të fitojë në Prishtinë.

Ndërkohë, kujtojmë që 1800 vota me kusht, me postë dhe personave me nevoja të veçanta ende nuk janë numëruar.