Kosovë: Paralajmërohet padëgjueshmëri ndaj masave të vëna nga Qeveria

Photo by: facebok page Prishtine - Door74

Oda e Hotelerisë dhe Turizmit, nëpërmjet një letre drejtuar Qeverisë së Kosovës, ka kërkuar garanci nga kryeministri Albin Kurti se masat që do të hyjnë në fuqi më 7 prill dhe që pritet të zgjasin deri më 18 prill do të lehtësohen pas kësaj periudhe.

Kjo odë ka kërkuar takim me përfaqësues institucionesh për të kuptuar si është menduar kompensimi i humbjeve. Nëse këto kërkesa s’do të përmbushen, OHTK-ja ka paralajmëruar “padëgjueshmëri totale”.

Të hënën Qeveria mori masat e reja në luftën kundër koronavirusit. Ndër pikat më të përfolura ishte mbyllja e gastronomisë.

“Oda e Hotelierisë dhe Turizmit të Kosovës nisur nga fakti se sektorët që ajo përfaqëson janë më të goditurit në të gjitha aspektet nga virusi, nuk e përkrah vendimin e Qeverisë së Kosovës lidhur me masat e marra me qëllim të frenimit të pandemisë Covid-19 që ka goditur tërë botën, dhe veçanërisht e kundërshton vendimin e njëanshëm. OHT kërkon garanci nga Qeverisa që pas datës 18 prill do të lehtësohen këto masa dhe do lejohet të punojë të gjithë sektorët e ekonomisë. Ne si OHT vlerësojmë se këto dhe masat e tjera të marra nga Qeveria po e godasin ekonominë e vendit tonë dhe po bëjnë që të largohen të gjithë turistët e madje edhe vetë qytetarët e Kosovës për pushime drejt vendeve të rajonit”, thuhet në njoftimin e kësaj ode.

“OHT ju paralajmëron se nëse nuk merren parasysh kërkesat tona jemi të detyruar edhe përkundër dëshirës sonë të marrim hapa, madje edhe ata më të rëndët, siç janë mbajtja e protestave dhe demonstratave pa marrë leje dhe pa paralajmëruar fare, e më e rënda të shkojmë deri në padëgjueshmëri totale”, përfundon letra e OHTK-së drejtuar Qeverisë.