Kosovë: Miratohet Programi për Mbrojtjen Gjithëpërfshirëse

Qeveria e Kosovës ka miratuar të mërkurën Programin Kombëtar për Mbrojtjen Gjithëpërfshirëse.

Kryeministri i Kosovës, Albin Kurti, ka thënë se ky program synon të ndërtojë qëndrueshmëri kombëtare në mënyrë që shoqëria të përgatitet të rezistojë, reagojë e të rimëkëmbet në raste të fatkeqësive natyrore a sulmeve të armatosura.

“Bazuar në programin tonë qeverisës, ndryshimeve në ambientin strategjik të sigurisë dhe me qëllim të forcimit të sistemit të mbrojtjes së Republikës së Kosovës, Ministria e Mbrojtjes ka hartuar programin kombëtar për mbrojtjen gjithëpërfshirëse. Mbrojtja e sovranitetit dhe integritetit nga kërcënimet e jashtme dhe të brendshme konvencionale dhe jokonvencionale dhe ruajtja e jetës dhe pasurisë së qytetarëve në raste të fatkeqësisë natyrore janë interesa jetike të Republikës së Kosovës.

Kurti ka thënë se programi është hartuar bazuar në sisteme të ngjashme që aplikohen në vende të ndryshme të NATO-s.

“Ky program synon të ndërtojë qëndrueshmëri kombëtare në vendin tonë në mënyrë që shoqëria jonë të përgatitet të rezistojë, reagojë e të rimëkëmbët në raste të fatkeqësive natyrore a sulmeve të armatosura. Sistemi ka në thelb mbështetjen që qytetarët ia japin në baza vullnetare ushtrisë sonë, FSK-së, por edhe të kombinuar me strukturat tjera shtetërore”, ka thënë Kurti.

Ministri i Mbrojtjes, Ejup Maqedonci, ka thënë se programi është hartuar mbi bazën e objektivave dhe planifikimeve strategjike të ministrisë që ai udhëheq.

“Përderisa Forcën e Sigurisë po e ndërtojmë dhe zhvillojmë në përputhje me planin gjithëpërfshirës të tranzicionit, me programin e mbrojtjes gjithëpërfshirëse po vendosim bazën për përgatitjen e qytetarëve dhe institucioneve për rolin e tyre në sistemin mbrojtës, për mbrojtjen e hapësirës së informacionit dhe dezinformatave dashakeqe, për të siguruar vijimësimin e funksionimit të furnizimeve dhe shërbimeve esenciale në situata krize dhe për të punuar në funksionalizimin e strehimoreve kolektive dhe aktivitete të tjera”, ka thënë Maqedonci.