Kosovë: Mashtrimet me naftë dëmtuan buxhetin në vlerë 600 mijë euro

Dogana e Kosovës ka njoftuar se janë arrestuar 3 persona pas disa inspektimeve të kryera, ku është zbuluar mashtrim me taksa, përkatësisht shmangie nga detyrimet doganore në vlerë prej 600 mijë eurosh te tri subjekte që operojnë në fushën e tregtisë me derivate të naftës, transmeton Albinfo.ch.

“Si rezultat është zbuluar lirimi i bazuar në dokumente të falsifikuara ndër vite, fillimisht nga këto tri subjekte që kanë deklaruar edhe ndërlidhjen mes vete. Dyshimi është se këto subjekte kanë liruar në import derivate duke i shkaktuar dëm buxhetit të shtetit prej mbi 600 mijë euro gjatë tre vjetëve të fundit”, thuhet në njoftimin e Doganës.

Për më tepër, theksohet se dogana ka njoftuar prokurorin kujdestar dhe me vendim të prokurorit janë arrestuar personat përgjegjës të tri subjekteve të përfshira në këto procedura lirimi, përderisa hetimi do të vijojë në zbardhjen e rrethanave të këtyre rasteve.