Kosovë, hetohen 135 persona për terrorizëm

Rreth 135 persona po hetohen nga Prokuroria Speciale e Kosovës nën dyshimin se kanë marrë pjesë ose kanë indoktrinuar të rijnë që të luftojnë në ISIS  

Prokuroria Speciale e Kosovës është duke hetuar 135 persona që lidhen me terrorizimin, ndërsa ndaj disave tashmë ka nisur edhe procedura gjyqësore. Këta persona janë të dyshuar për pjesëmarrje, nxitje apo inkurajim të të rinjve kosovarë për të marrë pjesë në luftërat civile në Lindjen e Mesme.

“Në Prokurorinë Speciale të Kosovës, nga periudha paraprake, në vitin 2014, janë bartur 8 raste. Prej tyre 4 raste me 19 persona janë nën hetime, kurse 2 raste me 2 persona dhe një rast me persona të panjohur janë në fazën preliminare të hetimeve”, ka thënë zëdhënësja e Prokurorisë Speciale të Kosovës, Liridonë Kozmaqi.

Nga janari i vitit 2014 deri më tani, Prokuroria Speciale e Republikës së Kosovës, sipas saj, ka pranuar gjithsej 23 raste, prej të cilave, 3 raste të pranuara në vitin 2015 me 117 persona të dyshuar për vepra penale që ndërlidhen me terrorizmin.

Në përgjithësi, prokurorët e kësaj prokurorie kanë filluar hetimet ndaj 135 personave.

Vetëm gjatë vitit 2015, janë ngritur 4 aktakuza kundër 14 personave. Të pandehurit, siç shkruan REL, dyshohen se u kanë bërë thirrje personave të tjerë për të kryer ose për të marrë pjesë në kryerjen e veprave terroriste, të marrin pjesë në aktivitetet e grupit terrorist dhe të sigurojnë fonde dhe burime materiale.

Ministri i Punëve të Brendshme, Skënder Hyseni, ka konfirmuar se ka rreth 300 persona nga Kosova që janë përfshirë deri më tani në luftë në Siri apo edhe në Irak. Këta persona, nëse vazhdojnë të kthehen në Kosovë, do të bien ndesh me një ligj që ka nxjerrë në parim Kuvendi i Kosovës, i cili parashikon burg nga 5 deri 15 vjet për pjesëmarrje në ISIS.