Kosovë: Hapja e kufijve ajrorë dhe tokësorë, vendoset në javën e ardhshme

Është bërë e ditur nga shefi i kabinetit në Ministrinë e Infrastrukturës dhe Ambientit, Alban Zogaj, se në javën e parë të qershorit do të vendosin për hapjen e kufijve tokësorë dhe ajrorë.

“Faza e tretë e hapjes do të fillojë prej 1 qershorit e tutje dhe ne po shpresojmë shumë që gjatë javës së parë të kemi diskutime serioze për të parë se si do të hapen kufijtë dhe më pastaj me automatizëm  t’i hapim edhe fluturimet dhe aeroportin, kështu që unë po vlerësoj se java e parë e qershorit do të jetë kyçe për të marrë një vendim i tillë, pra akoma nuk është marrë një vendim i tillë, akoma nuk e kemi një datë të saktë se kur do ndodhë kjo. Por qershori është kyç… Ne po varemi dhe jemi në koordinim me MSH dhe IKSHP-në, në mënyrë që me na e dhënë dritën e gjelbër dhe kur mund të vazhdojmë tutje me fazën e tretë dhe me hapje eventuale të kufijve dhe fluturimeve”, deklaroi Zogaj.

Kujtojmë se Qeveria e Kosovës më 13 mars ka mbyllur kufijtë tokësorë për shkak të mospërhapjes së pandemisë. /Albinfo.ch