Kosovë: Detaje për personin që u gjet i vdekur nën ashensor, kishte mbi 86 mijë franga me vete

Prokuroria Themelore në Gjilan, ka dhënë detaje për vdekjen e M.H., trupi i të cilit u gjet më 26 shkurt të këtij viti nën ashensorin e një ndërtese në Gjilan.

“Prokuroria njofton rreth personit të raportuar më 09 janar 2024 si person i humbur, i cili është gjetur pa shenja jete më 26 shkurt 2024. Në datën e lartcekur, rreth orës 22:45 minuta, nën ashensorin e një objekti banesor në Gjilan është gjetur pa shenja jete tani i ndjeri M.H. (1958), në të cilin objekt i njëjti ka banuar”, thuhet në njoftim.

Tutje bëhet e ditur se ai ishte raportuar si i humbur dhe rasti ishte hetuar si rrëmbim për shkak se pas lirimit nga qendra e paraburgimit i njëjti posedonte 86,250 franga.

“Pas raportimit si person i humbur, dyshimet e para kanë qenë në drejtim të veprës penale ‘’Rrëmbimi’’, pasi i njëjti pas lirimit nga qendra e paraburgimit në Lipjan, më 09 janar 2024, kishte pasur me vete 86,250 franga zvicerane, prandaj Prokuroria Themelore në Gjilan ka marrë aktvendim për fillimin e hetimeve në drejtim të kësaj vepre penale dhe veprime të shumta hetimore. Pas gjetjes së personit të zhdukur, në çantën e tij është gjetur edhe shuma e lartcekur e të hollave prej 86,250 franga zvicerane, si dhe 350 euro, tre telefona mobilë dhe sende të tjera personale”, sqarohet në njoftim.

Prokurori i shtetit ka dhënë urdhër që trupi i pajetë i të ndjerit të dërgohet për autopsi në Institutin e Mjekësisë Ligjore. Po ashtu janë angazhuar ekspertë nga Fakulteti Teknik, me qëllim të ekspertimit të funksionalitetit teknik të ashensorit, janë bërë urdhëresa për ekzaminimin e telefonave dhe janë ndërmarrë veprime tjera hetimore. Lidhur me veprimet e tjera të mëtutjeshme do të jeni të njoftuar me kohë.