Kosovare Neziri dëshiron titullin e “Top model of the World”

“Është nder dhe kënaqësi për mua të përfaqësoj atdheun e prindërve të mi, origjinën e emrit tim si dhe ashtu e falënderoj edhe shtetin gjerman që më dha këtë mundësi”, shprehet Kosovare Neziri

Bukuroshet më të mira të botës janë mbledhur në Hurghada të Egjiptit për të marrë pjesë në finalen e “Top Model of the World”, që do të mbahet të shtunën më 15 dhjetor.

Në këtë eveniment të bukurisë, Kosova përfaqësohet nga bukuroshja shqiptare e cila jeton në Gjermani, Kosovare Neziri, shkruan albinfo.ch.

“Tash e dy javë ndodhëm këtu në Egjipt, ku kemi bërë përgatitje të shumta dhe nga më të ndryshmet”, është shprehur ajo.

Bukuroshja me origjinë nga Ferizaj e cila banon në Dusseldorf thotë për “albinfo.ch” se në Egjipt ndodhet prej dy javësh nga ku, ka bërë përgatitje të shumta dhe nga më të ndryshmet.

“Shpresoj të marr ndonjë çmim të merituar. Jam më vullnet të fort dhe me hapa drejt të ardhmes. Në një mënyrë apo tjetër dua t’iu tregoj botës se edhe femrat shqiptare dinë, duan dhe ia dalin”.

Kosovarja ndihet e privilegjuar që ka mundësinë ta përfaqësojë shtetin  e Kosovës në gara të bukurisë botërore. “Është nder dhe kënaqësi për mua të përfaqësoj atdheun e prindërve të mi, origjinën e emrit tim si dhe ashtu e falënderoj edhe shtetin gjerman që më dha këtë mundësi”.

Për Kosovaren kjo nuk është hera e parë që përfaqëson Kosovën. Në janar të këtij viti ajo mori pjesë në “Miss Intercontinental 2018”.

Ndërkohë në vitin 2017, Kosovare Neziri fitoi vendin e parë në “Miss Niderrhein” kështu që iu dha mundësia të jetë pjesë e garës së bukurisë në “Miss Gjermania”.

---