Kosova voton sot

Valdete Daka, kryetare e KQZ-së, tha se gjithë procesi ka nisur mbarë dhe po vëzhgohen nga një numër i madh i vëzhguesve vendorë e ndërkombëtarë

Përveç një qendre votimi në veriun e Kosovës, të gjitha qendrat e tjera të votimit janë hapur në ora 7 e mëngjesit në Republikën e Kosovës, konfirmo Komisioni Qendror i Zgjedhjeve. Sipas kryetares Valdete Daka, gjithë procesi ka nisur mbarë dhe po vëzhgohen nga një numër i madh i vëzhguesve vendorë e ndërkombëtarë.

 

”Në atë vendvotim (veri) nuk është shpërndarë materiali për këtë arsye nuk ka arritur të hapet”, deklaroi Daka, kryetare e KQZ-së. Ajo ishte votuesja e parë që ka shpallur të hapur zyrtarisht qendrën e votimit në Fakultetin Teknik në Prishtinë.

 

“Shpresoj se të gjithë qytetarët e Kosovës do të dalin në votim dhe me votën e tyre, do ti zgjedhin përfaqësuesit e tyre, për të cilët mendojnë se janë më të mirët. I uroj sukses të gjithë qytetarëve të Kosovës, iu dëshiroj një ditë të mbarë dhe le të fitoi Kosova”, deklaroi Daka.

 

Këto janë zgjedhjet e pesta lokale prej përfundimit të luftës. Të drejtë vote kanë mbi 1 milionë e 700 mijë votues. Zgjedhjet do të zhvillohen në 798 qendra të votimit, ose në 2366 vendvotime.

 

Sipas KQZ-së, zgjedhjet vëzhgohen nga mbi 30 mijë e 173 vëzhgues, ku janë të përfshirë vëzhguesit e partive politike, por edhe të Demokracisë në veprim dhe institucioneve të tjera ndërkombëtare.

 

E veçanta e këtyre zgjedhjeve është se për herë të parë ato mbahen në gjithë territorin e Kosovës, përfshirë edhe katër komunat e veriut. Këto të fundit në katër zgjedhjet e kaluara kanë bojkotuar procesin, ndërsa kanë funksionuar si struktura paralele të financuara nga Beogradi.

 

Për mbarëvajtjen e procesit zgjedhor janë angazhuar një numër i konsiderueshëm i policëve të Kosovës.

 

“Policia e Kosovës do të kujdeset për mbarëvajtjen e zgjedhjeve në tërë Kosovën, ndërsa në veri do ta kemi asistencën e pjesëtareve të EULEX-it”, ka deklaruar për mediet e Prishtinës, drejtori i Operativës në Policinë e Kosovës, Rashit Qalaj.

---