Kosova synon organizimin e Lojërave Mesdhetare, Prishtina 2030

Zyra e Kryeministrit te Kosoves

Kosova po synon që më 2030 të sjellë Lojërat Mesdhetare në Prishtinë. Kështu, kryeministri i Kosovës, Albin Kurti, ka ftuar në takim koordinues pjesëtarët e kabinetit qeveritar për të diskutuar për kandidaturën e Kosovës për organizim, përcjell albinfo.ch.

Bëhet e ditur që është diskutuar për rëndësinë dhe ndikimin pozitiv që do të kishte organizimi i këtyre lojërave për Kosovën. “Ky është një moment i rëndësishëm për ne si shtet, por edhe për ne si qeveri për të demonstruar potencialin tonë për të bërë punë të mëdha”, ka thënë Kurti.

Ministri i Kulturës, Rinisë dhe Sportit, Hajrulla Çeku, theksoi se ndikimi i këtij organizimi shkon përtej sportit. U thekua nevoja dhe rëndësia e bashkëpunimit dhe mbështetjes ndërinstitucionale në përgatitjen dhe finalizimin e aplikimit zyrtar dhe të integruar, përcjell albinfo.ch.

Lojërat 2030 shënon edicionin e 21-të të kësaj ngjarjeje multi-sportive, e cila i bën bashkë sportistët dhe qytetarët e 26 shteteve të tri kontinenteve, të cilët preken nga ujërat e Mesdheut.

Kosova kishte shpallur zyrtarisht kandidaturën për organizimin e këtyre lojërave në fillim të muajit prill.