Kosova po lufton kundër rritjes së xhihadistëve

Kosova ka 1.8 milionë banorë, derisa vlerësohet se 300 qytetarë i janë bashkuar luftës islamike në Siri

Albert Berisha, është një i diplomuar kosovar në Universitetin e Tiranës. Ai kaloi disa javë në Siri në vjeshtën e vitit 2013, shkruan ‘internacional.elpais.com’.

Ai besonte se do të luftonte kundër regjimit të Bashar Al-Assad, por papritur përfundoi në radhët e Shtetit Islamik (ISIS), përcjell albinfo.ch.

Duke pretenduar se një i afër është sëmurë, ende pa hyrë në luftë, u kthye në shtëpi, ku në vitin 2014 u arrestuar për lidhje me organizatën terroriste. Në prillin e kaluar, ai u dënua tri vjet e gjysmë me kusht.

Berisha është penduar. Ai ka themeluar një OJQ, për të gjithë ata që janë penduar. Historia e tij është e njohur në një vend, që lufton ashpër terrorizimin. 15 vjet është dënimi me burg për të gjithë ata që luftojnë në shtete tjera.

Më shumë se 100 persona janë arrestuar nga shtatori i vitit 2014, të cilët kanë marrë pjesë direkt ose indirekt në luftën në Siri. Sipas raporteve rreth 300 qytetarë nga Kosova kanë marrë pjesë në luftën në Siri, dhe gati gjysmë janë kthyer (130). Duke marrë parasysh se ka 1.8 milionë banorë, Kosova ka mesataren më të lartë në Evropë për kokë banori, por numri është i vogël në krahasim me vendet tjera, si Belgjika apo Franca.

“Që nga shtatori i vitit 2015, asnjë kosovar nuk ka udhëtuar në Siri ose Irak”, ka thënë Enver Hoxhaj, ministër i Punëve të Jashtme të Kosovës.