Kosova, pa humbje në 606 ditë

(AP Photo/Visar Kryeziu, FILE)

Kombëtarja e Kosovës nuk di për humbje që nga tetori i vitit 2017.

Humbjen e fundit Kosova e kishte pësuar më 9 tetor të vitit 2017 nga Islanda, në ndeshjen e fundit të ciklit kualifikues të kampionatit botëror “Rusia 2018”.
Që nga nëntori i vitit 2017 Kosova njeh tetë fitore dhe katër barazime. Por, kundër shteteve që radhiten në 100 më të mirat e botës, Kosova njeh vetëm humbje, raporton KTV, përcjell albinfo.ch.

“Dardanët” synojnë ta vazhdojnë serinë pozitive edhe ndaj Malit të Zi, kombëtare e cila ka rezultate negative në Podgoricë. Nga pesë ndeshjet e fundit, Mali i Zi ka humbur tri ndeshje, ka një barazim dhe një fitore.

Ndeshjen e fundit Mali i Zi në Podgoricë e ka fituar në shtatorin e vitit të kaluar ndaj Lituanisë, në kuadër të Ligës së Kombeve.

Kosova ndodhet në pozitën e 127-të në ranglistën e fundit të publikuar nga Shtëpia Botërore e Futbollit, derisa ajo e Malit të Zi në vendin e 51-të.