Kosova nuk do të bëjë presion për lojtarë

Ndihmësi i përzgjedhësit të Përfaqësueses së Kosovës, Muharrem Sahiti ka folur për lojtarët që mund t’i ftojë Kosova. “Nuk do t’i dëmtojmë përfaqësueset tjera, por varet nga lojtarët që bëjnë zgjedhjen e tyre. Nuk do të kenë presione dhe nuk do t’i quajmë tradhtarë ata që nuk pranojnë. Uroj që të marrin vendimin e duhur dhe vendimin e drejtë. Momenti është që ata të kontribuojnë për Kosovën”, ka thënë Sahiti për KTV-në, përcjell albinfo.ch.

Ai ka folur edhe për Adnan Januzaj dhe të tjerët. “Do të kemi kontakte me Januzajn, por nuk do të përdorim formën e inateve nëse nuk e ka ftuar Belgjika dhe tash si kundërshtim ndaj Belgjikës ai të luajë për Kosovën. Nëse një lojtar nuk e ndien kënaqësinë shpirtërore për Kosovën nuk do të llogaritet si përforcim. Zgjedhjen ta bëjnë me zemër dhe jo sa për sy e faqe”, ka thënë Sahiti.