Kosova lë pas Zvicrën e Norvegjinë, e treta për siguri globale

Raporti i Gallup-it 2025 – Kurti: Kosova ndër vendet më të sigurta në botë

Sipas raportit më të ri ndërkombëtar Gallup Global Safety Report 2025, Kosova është ndër vendet më të sigurta në botë, duke u pozicionuar e treta globalisht dhe e para në Evropë për ndjenjën e sigurisë së qytetarëve dhe besimin ndaj institucioneve të zbatimit të ligjit, transmeton albinfo.ch.

Raporti tregon se Kosova ka arritur 94 pikë nga 100 në Indeksin e Ligjit dhe Rendit, duke u renditur pas Taxhikistanit (97 pikë) dhe Singaporit (95 pikë). Ky rezultat vendos Kosovën përpara shteteve të zhvilluara evropiane si Islanda, Norvegjia, Austria dhe Zvicra.

Policia e Kosovës vlerëson se këto rezultate reflektojnë përkushtimin e saj në garantimin e rendit dhe sigurisë publike, si dhe bashkëpunimin e ngushtë me komunitetin dhe partnerët strategjikë ndërkombëtarë. “Ky vlerësim është një dëshmi e qartë e punës dhe përkushtimit tonë në mbrojtjen e jetës dhe pronës, dhe në ofrimin e shërbimeve profesionale, efektive dhe llogaridhënëse për qytetarët,” thuhet në njoftimin e Policisë.

Edhe Kryeministri në detyrë i Kosovës, Albin Kurti, ka përgëzuar këtë arritje, duke theksuar se vendi renditet i treti në botë dhe i pari në Evropë për rend dhe ligj. Raporti gjithashtu e klasifikon Kosovën ndër dhjetëshen e parë të vendeve më të sigurta për të ecur natën. “Ky është një tregues i rëndësishëm që qytetarët tanë po gëzojnë një nga të drejtat më themelore, dhe reflekton forcën e institucioneve tona,” deklaroi Kurti.

Ky raport ndërkombëtar vjen si një konfirmim i punës së vazhdueshme të Policisë dhe institucioneve të sigurisë në vend, duke e vendosur Kosovën në hartën globale si një nga vendet më të sigurta për jetesë dhe qetësi publike. /Albinfo.ch

---