Kosova kërkon reagimin e BE-së pas vendimeve të fundit të qeverisë së Serbisë

Besnik Bislimi

Zëvendëskryeministri i Kosovës, Besnik Bislimi, ka thënë se Serbia po vazhdon ta pengojë procesin e dialogut duke shkelur parimet e marrëveshjeve mes dy shteteve, së fundi duke miratuar një projektligj përmes së cilit e ka shpallur Republikën e Kosovës “zonë të mbrojtjes së veçantë sociale”.

“Përmes lëvizjeve të veta në terren, duke përfshirë nxitjen e përshkallëzimeve në 3 vjetët e fundit, sulmin në Banjskë, sulmet kundër institucioneve tona, inkursionin në territorin tonë dhe rrëmbimin e policëve, barrikatat në veri, MIG-ët që fluturojnë pranë kufirit tonë, vënia e ushtrisë në gatishmëri të plotë dhe të lartë luftarake dhe tani, me projektligjin për përndjekje të paraqitur dje, konstruktiviteti i saj i rremë vazhdon të ekspozohet”, ka shkruar ai në platformën X.

Bislimi ka pyetur se cili është perceptimi i Bashkimit Evropian karshi Serbisë.

“Ai perceptim ku ajo pabesueshëm përpiqet të shfaqet si ‘konstruktive’ duke deklaruar përkushtimin e saj në proces, apo ai që miraton projektligje të tilla dhe vazhdimisht shkel marrëveshjet dhe cenon integritetin dhe sovranitetin tonë territorial? BE-ja si ndërmjetës duhet të përgjigjet dhe të reagojë me vendosmëri”, ka shkruar tutje Bislimi.

Në projektligjin e qeverisë serbe thuhet se ofrohet mbështetje financiare për të papunët, gjegjësisht ata mbi 65 vjeç që nuk kanë ushtruar të drejtën e pensionit, “me qëllim të mbijetesës së tyre në atë territor dhe inkurajon ruajtjen e trashëgimisë kulturore dhe historike, me theks në zhvillimin demografik, ekonomik dhe kulturor”.

Në të njëjtën mbledhje qeveria serbe miratoi edhe një projektligj për, siç ka thënë ajo, organizimin dhe kompetencën e autoriteteve gjyqësore serbe në ndjekjen e veprave penale të kryera në territorin e Kosovës.