Kosova i plotëson 73% nevojat e furnizimit me grurë

Rritja edhe e çmimit të derivateve të naftës dhe tregu jo i sigurt, ka bërë që fermerët të mos jenë shumë entuziastë të merren me bujqësi.

Agresioni rus mbi Ukrainën ka bërë që shumë çmime të produkteve ushqimore të rriten. Mes tyre edhe ai i miellit, e rrjedhimisht edhe i bukës. Punimi i tokës është lënë anash në Kosovë për shumë vjet. E kjo për shumë arsye.

Faton Peci, ministër i Bujqësisë, Pylltarisë dhe Zhvillimit Rural, tha se sigurimi i i ushqimit është një temë që po e preokupon tërë globin, madje edhe liderët e superfuqive botërore, prandaj edhe ne, si Kosovë, nuk kemi si mos të jemi të prekur karshi rritjes së çmimeve në tregun botëror.

Sipas tij, krahas kësaj nevoje janë bërë edhe angazhimet institucionale dhe ato të bizneseve dhe fermerëve, për të zgjeruar kapacitetet për të siguruar bukën.

“Në kuadër të angazhimeve tona, si Ministri edhe si Qeveri, kemi tentuar të japim maksimumin, brenda mundësive dhe kapaciteteve buxhetore, që të rrisim nivelin e subvencioneve”, tha ai.

Ministri Peci foli edhe për shkatarët e krizës globale, si ajo e pandemisë, nga Covid-19, ashtu edhe luftën në Ukrainë pas agresionit rus atje, që ndikuan në shkëputjen e prodhimit, por edhe transportit.

“Kemi rritur përkrahjen në bujqësi, në rritjen e sipërfaqeve, kemi rritur përkrahjen për subvencionimin e mbjelljes së grurit me 474 euro për hektar, apo 216 për qind më shumë se vitin e kaluar, kemi rritur subvencionin për dëmet për disa kultura bujqësore…Kemi një rritje të sipërfaqes me 15 për qind të drithërave të bardha, kjo për shkak të krizës, pas pandemisë e agresionit rus në Ukrainë”, tha ai për rtk.

Bashkim Zejnullahu, kryetar i Shoqatës së Mullisëve, foli lidhur me atë se a do të mund të kemi mbi 70 për qind nga prodhimi vendor i grurit, dhe sa do t’i mbulojmë nevojat tona me grurë. “Mendoj se qeveria e ka bërë një hap të rëndësishëm në rritjen e prodhimit të grurit për t’i mbuluar sa më shumë me prodhimet e tona dhe unë mendoj që sot jemi diku te 60-përqindëshi  edhe presim më shumë, siç e ceku ministri 73 për qind. Presim që me reformën e re të subvencionimit do të arrijmë në 80 për qind të furnizimit të nevojës së brendshme me grurë”, deklaroi mes tjerash, Zejnullahu.

 

---