Kosova feston “Ditën e lumturisë”

Kosova, sipas raportit të OKB-së, radhitet në vendin e 83-të për lumturi nga150 vendet në listë. Danimarka është vendi më i lumtur në botë  

Dita e lumturisë (Happiness Day) e iniciuar nga Organizata e Kombeve të Bashkuara, është festuar edhe në Prishtinë. Janë studentët kosovarë të Kolegjit “Universum” të cilët kanë vendosur që këtë vit t’i bashkëngjiten mbi 13 milionë njerëzve tjerë në botë, për ta festuar “Ditën e lumturisë”.

Kjo festë, për herë të parë është festuar në vitin 2012, ndërsa këtë vit festohet për herë të parë edhe në Kosovës.

Pas tre vitesh, kësaj feste i janë bashkuar edhe kosovarët, përkatësisht studentët e Universum të cilët përmes lumturisë duan ta dëshmojnë se vendi i tyre është pjesë e ngjarjeve botërore dhe e integruar sikurse kombet tjera të zhvilluara dhe ato në zhvillim, raporton TG.

Motoja e këtij viti për ditën e lumturisë është “lidhja me njerëzit”, ndërsa për çdo vit motoja e kësaj dite ndryshon, për t’i dhënë njerëzve arsye të ndryshme për të qenë të lumtur.

Kosova sipas raportit të OKB radhitet në vendin e 83-të për lumturi nga150 vendet në listë. Indikatorët matës për lumturi sipas OKB-së janë GDP për capita, liria për të zgjedhur, pavarësia nga korrupsioni, jetëgjatësia e popullsisë dhe ekonomia e gjelbër.

Sipas raportit të OKB-së për vitin 2013/2014, Danimarka është vendi më i lumtur në botë. Ndërsa sipas një raporti tjetër, përkatësisht Happ Planet Report, Meksika është vendi më i lumtur dhe shtetet e Amerikës Latine janë më të lumturat.