Kosova ende pa sigurime shëndetësore

Tri vjet pas pavarësisë, Kosova vazhdon të mos ketë sigurime shëndetësore. Një ligj provizor ekziston që nga koha e UNMIK-ut, të miratuar në vitin 2004, por që nuk është implementuar kurrë.

Ndërsa vitin e kaluar qe përgatitur një projekt-ligj nga ana e Qeverisë në largim, por që nuk u miratuar nga Kuvendi, pas u shpërbë në nëntor.

Lidhur me këtë çështje sot u diskutua në një debat të organizuar nga Instituti Demokratik i Kosovës (KDI), në bashkëpunim me Qendrën për Hulumtime Shëndetësore (QHSH), ku të pranishmit u pajtuan se mungesa e sigurimeve shëndetësore dhe ligjit që rregullon këtë çështje, e dëmton Kosovën.

Drejtori ekzekutiv i QHSH-së, Haxhi Avdyli tha se në Kosovë nuk është bërë as hapi i parë – miratimi i Ligjit. “Megjithëse është thënë se reformat në shëndetësi janë prioritet, ende nuk është bërë asgjë në këtë drejtim”, ka thënë Avdyli, ndërkohë ka lexuar disa rekomandime që kanë dalë si rezultat i këtij punimi.

Sekretari i Përhershëm në Ministrinë e Shëndetësisë, Ilir Tolaj, ka thënë se dhjetë vitet e pasluftës kanë qenë të vështira për sistemin shëndetësor në tërësi. Sipas tij, edhe kur të aprovohet Ligji për sigurimet shëndetësore, nuk do të thotë se është implementuar  ky sistem. “Nga miratimi i ligjit, deri në implementimin e sigurimeve shëndetësore, duhen tre deri në pesë vite”. Tolaj ka thënë se për të zbatuar në praktikë sigurimet shëndetësore, kërkohet edhe vullnet politik.

Lidhur me implikimet buxhetore të sigurimeve shëndetësore ka folur Shyqeri Hyseni nga Ministria e Ekonomisë dhe Financave. “Për një vit, shpenzimet e fondit kapin shumën prej 296 milionë euro”, dhe si të tilla e rëndojnë mjaft shumë buxhetin e Kosovës, ka thënë ai.

Të pranishmit kanë kritikuar edhe qasjen e Qeverisë ndaj shëndetësisë në përgjithësi. Është vlerësuar se asnjë nga qeveritë e pasluftës në Kosovë nuk e ka pasur prioritet shëndetësinë.

Tryeza kishte pasur për qëllim sensibilizimin e publikut, e me theks të veçantë të institucionet vendimmarrëse për trajtimin me urgjencë të kësaj problematike, si dhe nxjerrjen e rekomandimeve që do të përdoren në punimin përfundimtar, në mënyrë që të gjenden format më të mira të ndërtimit të sistemit të sigurimeve shëndetësore në Kosovë.