Kosova anëtarësohet në RACVIAC

Sipas MPJ-së, anëtarësimi në këtë organizatë të Evropës Juglindore (RACVIAC) është i rëndësishëm për reformimin e sektorit të sigurisë

Kosova është anëtarësuar sot në organizatën e rëndësishme ndërkombëtare të sigurisë RACVIAC (Qendra për Bashkëpunim të Sigurisë, me seli në Zagreb) e themeluar në vitin 2000 me qëllim të nxitjes së dialogut dhe bashkëpunimit në çështjet e sigurisë në Evropën Juglindore.

“Anëtarësimi i Kosovës në këtë organizatë të Evropës Juglindore është i rëndësishëm për shumë procese reformuese civilo-ushtarake të cilat do të ndihmojnë reformën e sektorit të sigurisë”, konsideron Ministria e Jashtme e Kosovës e cila falënderon të gjitha shtetet anëtare që bën të mundur anëtarësimin në këtë organizatë.

Sipas MPJ-së, RACVIAC, përpos komponentës ushtarake, në fushëveprimin e saj ka edhe pjesën akademike.

“Ajo ndihmon bashkëpunimin kundër terrorizmit, bashkëpunimin rajonal në fushën e sigurisë, menaxhimin e fatkeqësive, katastrofave, integrimin evropian dhe euroatlantik, kontrollin e armëve dhe masave për ndërtimin e besimit dhe sigurisë (Confidence and Security Building Measures)”, thuhet në njoftim.

Ndryshe, RACVIAC bashkëpunon ngushtë me organizatat ndërkombëtare, OKB, NATO, BE, OSBE, SELEC, DCAF, UNDP, ITF, RCC, MARRI, etj. Në këtë organizatë bëjnë pjesë aktualisht 8 shtete anëtare të rajonit si Shqipëria, Bosnja, Kroacia, Maqedonia, Mali i Zi, Rumania, Serbia dhe Turqia.