Korridori 8 merr emrin “Nënë Tereza”

Kryeministri i Maqedonisë, Nikolla Gruevski ka propozuar që autostrada me gjatësi 300 kilometra që quhet "Korridori i 8" të mbajë emrin "Nënë Tereza"

Rruga e njohur si “Korridori i 8” që lidhë tri shtetet ballkanike, do ta mbajë emrin e nobelistës shqiptare “Nënë Tereza”. Kështu ka propozuar kryeministri i Maqedonisë, Nikolla Gruevski, sipas të cilit, edhe një bankënotë e re në këtë shtet, do të mbajë figurën e saj.

　

Ky propozim i shefit të shtetit maqedonas pritet të miratohen nga Qeveria e Shkupit në njërën nga mbledhjet e saj. Këto komente kryeministri Gruevski i ka bërë në një intervistë dhënë gazetës indiane “Times of India”.

　

Sipas kryeministrit Gruevski, autostradë më të rëndësishme në rajon, me gjatësi prej 300 kilometrash do ta mbajë emrin e “Nënë Terezës”, dhe se kjo rrugë e lidh Shkupin me Bullgarinë dhe Shqipërinë, një pjesë e së cilës do të duhet të përfundojë në vitin 2017. 　kjo rrugë në antikitete quhej “Vija Egnatia”.

　

Gazeta më e lexueshme në Indi ishte interesuar për “Nënë Terezën”, e cila kishte lindur në Shkup, ndërsa pjesën më të madhe të jetës së saja e kaloi në Indi, në qytetin e Kalkutës. Ajo u dallua për rolin e saj bamirës, ndërsa mesazhi i saj për paqe dhe ndihmë u çmua nga gjithë bota.

　

Sipas agjencisë INA, emrin e Nënës Terezë tashmë e mbajnë Qendra Klinike në Shkup, Spitali i Gjinekologjisë, Shtëpia Përkujtimore në pjesën qendrore të kryeqytetit të Shkupit.

　

“Nëna Terezë është simbol i ri i Maqedonisë. Pasardhësit e saj vijnë këtu, çdokush e njeh, përfshirë edhe vendet e Lindjes së Mesme”, ka theksuar kryeministri Gruevski, pa përmendur origjinën e saj shqiptare dhe emrin atëror Gonxhe Bojaxhiu.

　

Projekte për Nënë Terezën ka paralajmëruar dhe biznesmeni indias Subrajta Roj, i cili ka promovuar tashmë ngritjen e një përmendore gjigante e lartë 18 metra në sheshin e Shkupit. Po ashtu është paralajmëruar edhe një qendër për përkujdesje të të moshuarve në periferi të kryeqytetit.

　

Ndryshe, emri i “Nënë Terezës” ka pushtuar gjitha sheshet nëpër Shqipëri e Kosovë. Sheshi kryesor në Prishtinë e mbanë emrin e saj, sikurse e mbanë emrin “Nënë Tereza” edhe Aeroporti i Tiranës.

---