Koronavirusi, Zvicër: Policia parandaloi protestat në disa qytete të vendit

Policia u ka kërkuar demonstruesve ta lëshonin sheshin. Ata që nuk e përmbushën kërkesën u kontrolluan dhe u denoncuan

Policia ka parandaluar sot mitingjet e kundërshtarëve të masave kundër përhapjes së koronavirusit, në Bernë, shkruan srf.ch. Ajo ka mbyllur sheshin kryesor të qytetit, “Bundesplatz” në mesditë dhe ka kontrolluar pasdite disa grupe të vogla njerëzish që po ecnin me flamuj në duar.

“Ne u drejtohemi njerëzve, bëjmë kontrolle dhe i largojmë ata nga vendi i grumbullimit”, mund të lexohet në një  Twitter të shkruar nga Policia e Kantonit të Bernës, transmeton albinfo.ch. Disa veta janë marrë me vete në ambientet e policisë.

Me vetëm disa duzina pjesëmarrësish, përpjekja për të demonstruar sot pati përmasa të vogla. Forca e policisë së mobilizuar, nga ana tjetër, ishte mjaft e madhe.

Edhe në Sechseläutenplatz të Cyrihut, disa dhjetëra njerëz kanë protestuar gjithashtu kundër masave të koronavirusit, përcjell albinfo.ch. Policia u ka kërkuar demonstruesve ta lëshonin sheshin. Ata që nuk e përmbushën kërkesën u kontrolluan dhe u denoncuan.

Edhe në qytete tjera të Zvicrës sot ka pasur përpjekje për të demonstruar kundër masave të koronavirusit. Vala e protestave, e udhëhequr kryesisht nga lëvizjet e djathta ka përfshirë edhe Bazelin, Winterthurin etj.

---