Korfuz, anija përfshihet nga flakët, rrezikohen 500 pasagjerë

Anija italiane “Norman Atlantic” që po lundronte drejt Ankonas me 478 pasagjerë në bord u përfshi nga flaka. Zjarri dyshohet të ketë rënë në garazhin e tragetit

Një anije pasagjerësh që udhëtonte nga Igumenica e Greqisë drejt Ankonas në Itali, është përfshirë nga flakët duke rrezikuar jetën e rreth 500 pasagjerëve sa gjenden në bord. Pas alarmit se zjarri ka përfshirë garazhin e anijes, tri shtete janë vënë në alarm për t’i shpëtuar udhëtarët, Greqia, Shqipëria dhe Italia.

Sipas mediave greke, në anijen italiane “Norman Atlantic” të kompanisë Grimaldi, udhëtojnë rreth 478 pasagjerë, ndërsa zjarri dyshohet të ketë rënë në garazhin e tragetit, ku ndodhen edhe 222 automjete. Anija u përfshi nga flakët afër ishullit të Korfuzit, që është afër Shqipërisë.

Në bordin e tragetit ishin 268 pasagjerë me kombësi greke, qindra italianë dhe 22 shtetas të Shqipërisë, ndërsa 54 persona janë pjesë e ekuipazhit.

Pasagjerët kanë telefonuar në televizionet greke, ku kanë bërë të ditur se fatmirësisht nuk ka asnjë person të lënduar në bordin e anijes. Por sipas tyre, ndërsa priten ekipet e shpëtimit, në bord është përhapur panik dhe pasagjerët dëgjohen teksa bërtasin “Po digjemi, po digjemi.”

Sipas mediave në Greqi, rreth 150 pasagjerë kanë mundur të zbresin nga trageti, duke përdorur varkat e shpëtimit, ndërsa të tjerët kanë mbetur të bllokuar, pasi ndërprerja e energjisë elektrike ka bërë të pamundur uljen e varkave të tjera.

Ndërkohë, shtatë anije shpëtimi kanë mbërritur në vendin e ngjarjes dhe kanë nisur evakuimin e pasagjerëve, por operacioni i shpëtimit pritet të zgjasë, pasi era e fortë dhe reshjet e shiut e vështirësojnë punën. Në zonën përreth anijes fluturojnë edhe 5 helikopterë, raporton BW.

Po ashtu raportohet se tre fëmijë të cilët i mori flaka, janë transportuar në gjendje hipotermie në spitalin e Leces në Itali. Mediat italiane bëjnë të ditur se fëmijët janë të moshës 2 dhe 3 vjeçare dhe kanë paraqitur probleme shëndetësore për shkak të qëndrimit në të ftohtë për një kohë të gjatë.

Sipas informacioneve nga vendi i ngjarjes, përreth tragetit “Norman Atlantic” që është përfshirë nga flakët lundrojnë në det të trazuar dhjetëra varka shpëtimi, me qindra pasagjerë që u rrezikohet jeta, për shkak të kushteve të vështira të motit.

Ministria shqiptare e Mbrojtjes ka nisur anijen “Butrinti”, në ndihmë të pasagjerëve që ndodhen në tragetin italian që u përfshi nga flakët në det të hapur. Anija ‘Butrinti’ do të jetë pjesë e operacionit të evakuimit të pasagjerëve. Ndërkohë ministrja e Mbrojtjes Mimi Kodheli ka komunikuar me homologen italiane në lidhje me operacionin e evakuimit të pasagjerëve të anijes.