Konfiskohen tetë iPhone 16 në aeroportin e Prishtinës

Dogana e Kosovës ka konfiskuar të premtën tetë iPhone 16 në Aeroportin Ndërkombëtar të Prishtinës “Adem Jashari”, përcjell albinfo.ch.

Dogana njofton se ka parandaluar rastin e kontrabandimit me telefonat e rinj, dhe se ndaj personave të përfshirë janë inicuar procedurat kundërvajtëse.

“Mbrëmë oficerët doganorë në aeroport, në kuadër të zbatimit të planit operativ për luftimin e kontrabandës, kanë realizuar me sukses disa operacione të rëndësishme. Në dy raste të veçanta janë parandaluar përpjekjet për kontrabandimin e tetë (telefonave të rinj **iPhone 16**, të sapodalë në treg për shitje. Të gjitha pajisjet janë konfiskuar. Ndaj personave të përfshirë janë inicuar procedurat kundërvajtëse në përputhje me ligjet në fuqi”, thuhet në njoftim.

Tutje,  Dogana e Kosovës thekson se do të vazhdojë përkushtimin në parandalimin e kontrabandës dhe mbrojtjen e tregut të ligjshëm.