Konfiskohen mbi 122 kilogramë drogë

Gjatë këtij operacioni, policia kosovare ka arrestuar katër persona të dyshuar se kanë transportuar 122 kilogramë e 180 gramë drogë

Policia e Kosovës, respektivisht Drejtoria për Hetimin e Trafikimit me Narkotikë (DHTN) ka konfiskuar të premten një sasi të konsiderueshme të substancave narkotike (122 kilogram) dhe ka arrestuar katër kosovarë.

“Në përkrahje të njësive speciale operative dhe krim-teknikës të  Policisë së Kosovës sot në orët e hershme të mëngjesit në komunën e Deçanit, ka realizuar me sukses operacionin policor të koduar“Fillimi”,thuhet në një kumtesë lëshuar nga Policia e Kosovës.

Gjatë këtij operacioni, sipas PK-së, janë realizuar dy bastisje në dy  lokacione, me ç’rast janë arrestuar katër persona të dyshuar dhe janë konfiskuar 122 kilogramë e 180 gramë substancë narkotike, që dyshohet
të jetë e llojit marihuanë dhe prova të tjera materiale.

Të arrestuarit janë: S. U (1985), P. U (1981), F. U (1983) dhe A. GJ i lindur me 1983. të gjithë këta janë shtetas të Kosovës.

“Të lartshënuarit janë arrestuar me dyshimin e bazuar se kanë kryer veprën penale Blerje, posedim, shpërndarje dhe shitje e paautorizuar e narkotikëve, substancave psikotropike dhe analoge”, raporton Policia.

Sipas kësaj të fundit, përveç drogës së konfiskuar, të pandehurve u janë konfiskuar edhe një revole e tipit TT, 512 fishekë të kalibrave të ndryshëm, 3000 franga zvicerane dhe 660 euro.