Komuniteti zviceran në Kosovë mblidhet sërish për të festuar Ditën Kombëtare

Pas kremtimit zyrtar, një tjetër festë për Ditën Kombëtare të Zvicrës në Kosovë

Ambasada e Zvicrës në Kosovë ka organizuar një aktivitet festiv me rastin e Ditës Kombëtare të Zvicrës, ku mori pjesë komuniteti zviceran që jeton në Kosovë. Mbrëmja u karakterizua nga muzikë, art dhe atmosferë shoqërore, duke u shndërruar në një moment të veçantë për bashkimin e diasporës zvicerane, transmeton albinfo.ch.

Në fjalën e tij, ambasadori i Zvicrës në Kosovë, Thomas Sprecher, theksoi rëndësinë e vlerave të përbashkëta mes dy vendeve, rolin e shtetasve zviceranë jashtë vendit si dhe inkurajoi ringjalljen e Klubit Zviceran në Kosovë, që pritet të shërbejë si platformë për shkëmbim dhe frymë komunitare.

Pjesë e programit artistik ishte koncerti i grupit S. Franklin & The Broken Wings, nën drejtimin e Philipp Labhart, si dhe një performancë arti nga grafitisti madebystern (Krystel Suire). Mbrëmja u shoqërua edhe me një bufe tradicionale zvicerane, ku spikati mousse Toblerone, përgatitur nga kuzhinieri i ambasadës në bashkëpunim me ekipin e Mero Event.

Organizatorët shprehën mirënjohje për ekipin e ambasadës dhe për komunitetin zviceran në Kosovë, të cilët kontribuuan që kremtimi i Ditës Kombëtare të shndërrohej në një sukses të plotë. /Albinfo.ch

---