Komuniteti mysliman shqiptar në Zvicër uron festën e Fitër Bajramit

20min/Matthias Spicher

Komuniteti Mysliman Shqiptar në Zvicër uron Fitër Bajramin, përcjell albinfo.ch.

Komuniteti Musliman Shqiptar në Zvicër (KMSHZ) njofton të gjithë besimtarët shqiptarë musliman që jetojnë dhe veprojnë në Zvicër se dita e parë e Fitër Bajramit është nesër, respektivisht të dielën, më 30 mars 2025.

Postimi i plotë-

Të nderuar vëllezër dhe motra!

Sot po përcjellim muajin Ramazan, muajin e agjërimit dhe të vlerave të larta shpirtërore. Ramazani na solli shumë mirësi dhe begati të dukshme dhe padukshme. Ai na afroi më shumë me Zotin, burimin e ekzistencës dhe të të gjitha krijesave. Lutemi që Allahu i Madhërishëm të pranojë të gjitha përpjekjet tona gjatë Ramazanit dhe të bekojë efektet e tij në këtë botë dhe në botën tjetër.

Nesër, vëllezër dhe motra, është Bajram, është festë e madhe gëzimi. Le t’i kalojmë ditët festive me fytyra të gëzuara dhe zemra të hapura, duke qenë pranë familjeve, të dashurve, miqve dhe fqinjëve tanë. Urojmë që gëzimi i Bajramit t’i përfshijë të gjithë dhe me lutje të kujtojmë vëllezërit dhe motrat tona në të gjithë vendet e botës, të cilët sot vuajnë dhe ndiejnë dhimbje për shkak të padrejtësive ndaj tyre.

Le të ruajmë dinjitetin dhe bukurinë e Bajramit, dhe të sigurohemi që asnjë përmbajtje e papërshtatshme të mos e dëmtojë këtë festë të madhe.

Urimin e Bajramit të Ramazanit e përcjellim, në radhë të parë te muslimanët në Zvicër, pastaj për të gjithë ata muslimanë që jetojnë dhe veprojnë në shtetet fqinje, për muslimanët tanë shqiptarë në vendlindjet tona dhe për të gjithë botën muslimane.

Allahu ynë na e mundësoftë që të jetojmë në paqe dhe dashuri! Edhe njëherë gëzimi dhe hareja qofshin me ju, me familjet dhe miqtë tuaj!

Me fat ju qoftë festa e Fitër – Bajramit!

Mehas Alija

Kryetar i KMSHZ-së