Kompania Gjermane hap 200 vende punë në Prishtinë

Kryetari Spend Ahmeti tha se synim strategjik i Komunës së Prishtinës është që ajo të shndërrohet në qendër të shërbimeve “out – source”

Kompania gjermane e thirrjeve “Deutsche Post DHL grup” ka hapur zyrtarisht përfaqësinë e vet në Prishtinë “IQ – to – Link” duke punësuar menjëherë 200 punëtorë. Kryetari i Prishtinës, Shpend Ahmeti tha se synim strategjik i Komunës është që ajo të shndërrohet në qendër të shërbimeve “out – source”.

Përfaqësuesi kompanisë “IQ-to-Link ” gjermani Jens Reichenbach tha se qëllimi fillestarë tani më është arritur, janë punësuar mbi 200 kosovarë të grupmoshave të ndryshme, dhe se ky aktivitet do ta zgjerojë edhe në rajon.

“Kjo kompani do të zgjerohet për mbi 430 vende të punës. Fazën përgatitore tani më e kemi përfunduar me punësimin e mbi 230 punëtorëve. Arsyeja e hapjes së kompanisë sonë në Kosovë është potenciali I madh që ka rinia Kosovare sa I përket njohurive të gjuhës Gjermane dhe përgjithësisht gjuhëve të huaja”, deklaroi ai.

Sipas Jens Reichenbach,kompania “IQ-to-Link” synon që përmes punësimeve të mbi 400 kosovarëve t’u ofrohen shërbime konsumatorëve nga tërë Evropa.

Komuna e Prishtinës përmes Ndërmarrjes Publike Banesore i ka ofruar kushtet që kjo kompani gjermane t’i hap këto vende të punës në Prishtinë, e jo në ndonjë vend tjetër të regjionit.

Sipas Shpend Ahmetit pagat që kjo kompani ndanë punëtorëve të saj, e të cilat kalojnë mbi mesataren e shërbyesve civil dhe të sektorit privat, pos që ndihmojnë mirëqenien e familjes së tyre kontribuojnë edhe në rritjen ekonomike të komunës së Prishtinës.

Ahmeti tha se do t’u krijohen kushte edhe kompanive të tjera që janë të interesuara për nënkontraktimin e shërbimeve pasi që në Komunën e Prishtinës ekziston një potencial i madh i të rinjve që do të punësoheshin në këto kompani.