Komisioni Evropian do t’i përgjigjet Qeverisë për heqjen e vizave për shtetasit e Kosovës me pasaporta serbe

Komisioni Evropian në prill të këtij viti kishte theksuar se liberalizimi i vizave i miratuar për Kosovën vlen vetëm për poseduesit e pasaportave të Kosovës dhe jo për ata qytetarë që kanë pasaporta të Administratës Koordinuese, e cila punon në kuadër të Ministrisë së Punëve të Brendshme të Serbisë.

Megjithatë në propozimin e ri, ky komision ka argumentuar se nuk ekzistojnë arsye për shkak të së cilave ishte vendosur që bartësit e pasaportave të Republikës së Serbisë me vendbanim në Kosovë të mos kenë mundësi të udhëtojnë pa viza, për dallim nga shtetasit e Serbisë me vendbanim në Serbi, përcjell albinfo.ch.

Zëdhënësja e Komisionit Evropian për çështje të brendshme, Anitta Hipper, ka paralajmëruar se komisionerja për Punë të Brendshme, Ylva Johanson, do të mund të përgjigjet në letrën dërguar nga ana e Qeverisë së Kosovës, shkruan REL.

E pyetur se cili është qëndrimi i Komisionit rreth vërejtjeve që ka dhënë Qeveria e Kosovës, dhe disa organizata joqeveritare nga Kosova, se me këtë propozim Komisioni do ta pengojë integrimin e serbëve në Kosovë dhe se një e gjë e tillë shkel integritetit territorial të Kosovës, ajo u shpreh se Komisioni Evropian më 16 nëntor ka miratuar propozimin me qëllimin për të siguruar përfshirjen e të gjithë qytetarëve të Ballkanit Perëndimor në mundësinë e udhëtimit pa viza në BE dhe se ky komisioni është në pritje që kjo të miratohet nga ligjvënësit në BE.

“Sa i përket çështjes së dytë, ajo do të përcillet nga komisionerja Johanson në përgjigjen e saj për pyetjen specifike”, ka thënë ajo, duke iu referuar letrës që Qeveria e Kosovës i ka dërguar Komisionit Evropian.

Zëvendëskryeministri i Kosovës, Besnik Bislimi, më 20 nëntor i ka dërguar një letër Komisionit Evropian dhe Këshillit të BE-së, ku thotë se ky propozim shkel sovranitetin e Kosovës, pengon integrimin e serbëve në Kosovë dhe hap rrezikun e përdorimit të të dhënave të pasakta, çka paraqet edhe kërcënim të sigurisë.