KFOR-i: Mbetet i paqartë lokacioni i “arrestimit” të policëve

Misioni i NATO-s në Kosovë, KFOR, ka reaguar pas rrëmbimit të tre policëve kufitarë të Kosovës nga njësitet speciale të Policisë së Serbisë.

Për KFOR-in mbetet e paqartë se ku, siç thonë ata, u krye arrestimi pas rishikimit të lokacionit të ngjarjes dhe bisedave me përfaqësues të institucioneve të Kosovës dhe autoriteteve të Serbisë.

“Bazuar në të dhënat në dispozicion, mbetet e paqartë se ku ishin zyrtarët policorë të Kosovës në momentin e arrestimit”, thuhet në njoftim.

Sipas KFOR-it, “në këtë lokacion, afër Vijës Kufitare Administrative, si institucionet e Kosovës, ashtu edhe autoritetet e Serbisë kanë përgjegjësi të qarta për t’u koordinuar me KFOR-in”, përcjell albinfo.ch.

Tutje misioni euroatlantik ka kërkuar që palët të kenë parasysh marrëveshjet që kanë nënshkruar më herët me ta.

“Ua rikujtojmë të dyja palëve përgjegjësitë e tyre sipas Marrëveshjes Ushtarako-Teknike në mes të Serbisë dhe KFOR-it dhe procedurat për koordinim ndërmjet Policisë së Kosovës, përfshirë Policinë Kufitare dhe KFOR-in”, thuhet në njoftim.

Mes tjerash, KFOR potencon se edhe patrullimi i policisë në kufi duhet të kryhet me pëlqim paraprak.

KFOR-i po ashtu “ua ka kujtuar të gjitha palëve se vendosja e Forcës së Sigurisë së Kosovës në veri të Kosovës kërkon pëlqim paraprak të komandanti të KFOR-it”.

Derisa u ka bërë thirrje palëve të përmbahen.

“U bëjmë thirrje të gjitha palëve që t’u përmbahen marrëveshjeve dhe procedurave për të bashkëpunuar me KFOR-in. Ne u bëjmë thirrje të dyja palëve të përmbahen nga retorika provokuese dhe të shmangin çdo veprim të njëanshëm që mund ta përshkallëzojë situatën në zonë. KFOR mirëpret përpjekjet e komunitetit diplomatik për zgjidhjen e çështjes dhe mbështet dialogun e lehtësuar nga BE-ja për normalizim raportesh”, përcjell albinfo.ch.

KFOR-i ka thënë se do të vazhdojë ta kryejë mandatin si “reagues i tretë – bazuar në Rezolutën 1244 të Këshillit të Sigurimit të OKB-së të vitit 1999 – për të siguruar mjedis të sigurt dhe liri të lëvizjes, për të mirën e të gjitha komuniteteve në Kosovë”.