Rritje enorme e numrit të votuesve nga diaspora, pse po ndodh kjo?

Një numër kaq i lartë i mërgimtarëve që kanë shprehur interesim për të votuar në Kosovë kësaj radhe i ka zënë në befasi të gjithë në Kosovë... Cilat janë arsyet kryesore të këtij mobilizimi?

Ditëve të fundit, vota e emigrantëve është një nga çështjet më të diskutuara në Kosovë, e cila ka shkaktuar edhe përplasje mes anëtarëve të Komisionit Qendror të Zgjedhjeve, përcjell albinfo.ch.

Në një intervistë, ish-zëvendësministrja e diasporës së Kosovës, Liza Gashi, u shpreh në Euronews Albania se për zgjedhjet e 14 shkurtit ka pasur “një rritje 200% të votuesve nga jashtë që kanë shprehur dëshirë të jenë pjesë e procesit zgjedhor”.

“Kemi pasur rreth 175 mijë pjesëtarë të diasporës që kanë kërkuar përmes email-eve zyrtare, postës dhe fax që të regjistrohen për aplikim nga jashtë”, tregoi ajo.

Gjithashtu, ajo renditi edhe disa nga arsyet kryesore të këtij interesimi të madh të emigrantëve për të qenë pjesë e zgjedhjeve, të cilat pritet të zhvillohen më 14 shkurt.

“Ky interesim ka të bëjë me pakënaqësinë e madhe që kanë pjesëtarët e diasporës në trajtimin e tyre karshi vendit tonë. Po kështu, ky mobilizim ka të vëjë për të adresuar të drejtat e tyre sociale, politike edhe ekonomike”, u shpreh ajo.

Sipas zonjës Gashi, kërkesa e tyre kryesore është adresimi i problemeve që kanë karshi konsullatave dhe ambasadave.

Edhe adresimi i kartonit të gjelbër dhe garantimi i të drejtës së votës, sipas zonjës Gashi, janë shqetësime të tjera të emigrantëve.

 

 

 

---