Këtë verë Ulqinit i rikthehet atraktiviteti turistik

Sezoni veror përbën shtyllën kryesore të ekonomisë së Ulqinit

Ndryshe nga 2 vjetët e kaluar në plazhet e Ulqinit, këtë verë shënohet rritje e numrit të pushuesve. Në qarkullimin rrugor brenda qytetit bien në sy veturat me targa zvicerane, në mesin e atyre gjermane, belge, kosovare, maqedonase, shqiptare e të tjera.

Një sezon i gjatë dhe i bukur veror

Këtë verë Ulqini praqet destinacionin turistik më atraktiv dhe më të vizituar. Pyetjes së  Albinfos drejtuar turistëve se për ç’ arsye i kanë përzgjedhur pushimet në këtë vend, i përgjigjen spontanisht: plazhet  e bukura, të pastërta, qetësia dhe shoqëria. “Këtu jo vetëm që bëjmë pushim, po edhe takojmë miq apo familjarë nga Kosova, apo i organizojmë pushimet së bashku këtu”, thotë Nikolina, e cila ka 20 vjet që jeton në Lucern dhe ka një pjesë të familjes së saj në Kosovë. Ajo udhëton me aeroplan për në Podgoricë të Malit të Zi, ku  gjendet aeroporti më i afërt nga Ulqini me rreth 2 orë rrugë me veturë. 

Vajza e saj 18-vjeçare shoqërohet nga dy shoqet e saj zviceriane, të cilat të mahnitura nga Ulqini që nga viti i kaluar, kanë vendosur të bëjnë më gjatë pushimin në të njëjtin vend edhe këtë verë. Çmimi për krevat në një banes private është 6 deri 10 euro, kurse një dhomë gjumi me një kuzhinë dhe një toalet kushton prej 20 deri 25 euro, dhe një apartement me dhomë gjumi, dhomë ndenje, kuzhinë dhe toalet kushton nga 35 euro deri 45 euro. Kuptohet, çmimi rritet varësisht nga pajisja luksoze, me TV, me kyçje dhe përzgjedhje të programeve satelitore, të klimatizuara apo dhe kyçje për internet dhe çmimi po ashtu zbret po qe se rrini më tepër se 5 ditë në të njëjtin vend.

© Ermira Islami

Plazhet, risitë dhe mangësitë

Në vijën bregdetare me rreth 20 km të gjatë, nga i cili 15 kilometra me rërë të imët, gjenden plazhe të rregulluara siç janë plazhi “Copacabana”, “Tampico”, “Bukuria Ulqinit”, “Tropicana beach”, “Safari” e të tjera.

Shumica e pushuesve janë familjarë. Pjesët e veçanta të plazheve janë shndërruar në terrene për zbavitjen e fëmijëve me lojëra të shumta dhe topogane. Pos, zhytjes apo notit në ujin e nxehtë të detit, lojërat me rërë përbëjnë atraksionin më të madh jo vetëm për fëmijë. “Edhe ne të rriturit vijmë këtu për shkak të rërës. Duke i mbuluar dhe mbajtur krahët një kohë në rërë, unë kaloj dimrin pa dhimbje reumatike”, pohon Agimi, 50- vjeçar, duke besuar në cilësinë shëruese të rërës. Falë klimës së butë mesdhetare, me lagështi të përshtatshme të ajrit, uji i detit dhe vegjetacioni i pasur, ky vend ofron kushte për shëndet të mirë. Të gjitha këto janë në shërbim edhe të turizmit rekreativ-mjekësor, jo vetëm gjatë verës, por edhe gjatë stinëve të tjera.“Tash nuk përtoj të udhëtoj për në Ulqin, sepse shumë shpejt dal në bregdet.

Prej Prizereni deri në Ulqin bëj 3 orë rrugë, falë autostradës së re”, shton Agimi. Por, rrugë të reja për fat të keq nuk gjejmë në brendinë e Ulqinit, ku ka shumë nevojë sidomos në sezonin e verës, pasi pushuesit dëshprohen duke pritur me orë të tëra në veturë të bllokuar, për të kaluar në pjesën tjetër të qytetit. “Prej orën 17 deri nga 20 pushuesit kthehen nga plazhet e Shtojit në drejtim të restoranteve për të ngrënë darkën në qendër të qytetit. Në këtë kohë pres rreth 2 orë i bllokuar në kolonë. Një vend turistik si ky duhet të zgjidhë sa më shpejt këtë problem. Është e patjetërsueshme konstruktimi i një rrugeje të dytë që lidh plazhin e madh me qendrën e qytetit”, reagon Agimi i mërzitur. Kjo nuk është e vetmja gjë që mërzit vizitorët. Gjatë fluksit të madh të pushuesve centrali elektrik nuk i përballon dot ngarkesës elektrike, kështuqë për pasojë ka ndaljen e herëpashershme të rrymës në orët e pasditës së vonshme.

Kalaja, plazhi i vogël dhe lumi Buna

Ulqini tërheq dhe dashamirësit e historisë dhe të kulturës me monumentet interesante të historisë së tij, duke qenë njëri nga qytetet më të vjetra në bregdetin Adriatik. Në Kalanë e Ulqinit gjendet kompleksi muzeor i qytetit, ku janë ekspozuar gjetje arkeologjike.  Nga plazhi i vogël shihet kalaja dhe këtu për kulturdashësit organizohet çdo verë Panairi i Librit. Tashmë një eveniment i zakonshëm, panairi i librit cilësohet si një faktor që ndihmon në integrimin e kulturës shqiptare. Letërsi për fëmijë, fjalorë e metoda për mësimin e gjuhës shqipe, po edhe të gjuhëve të huaja, histori, botime enciklopedike, udhërrefyes turistikë e të tjera i paraqiten lexuesve ulqinakë dhe pushuesve të huaj. Stendat e librit gjenden në shëtitoren e plazhit të vogël, në pasditen e vonshme kur plazhi mbyllet.

Për të tjerët që nuk dëshirojnë ujin e kripur të detit, mund të notojnë, të bëjnë surf mbi valët e lumit Buna. Nga bregu i lumit Buna shihet pamja e mrekullueshme e derdhjes së saj në det, kurse restorante të shumta të inkuadruara në ambientin e veçantë të lumit Buna ofrojnë specialitete të mrekullueshme deti. Ulqini këtë verë mbetet destinacioni i shumëdëshiruar turistik me mjaft hapësirë për pushim dhe argëtim.