Parlamenti zviceran miraton kompromisin për tatimin individual, hiqet “dënimi i martesës”

Ky model synon të promovojë drejtësinë fiskale ndërmjet çifteve të martuara dhe atyre në bashkëjetesë

Këshilli Kombëtar i Zvicrës ka vendosur të miratojë një kompromis për reformën tatimore që parashikon tatimin individual, duke hequr kështu të ashtuquajturin “dënim i martesës”.

Çfarë ndryshon?

Në të ardhmen, të gjithë tatimpaguesit do të tatohen pavarësisht nga statusi i tyre martesor. Ky model synon të promovojë drejtësinë fiskale ndërmjet çifteve të martuara dhe atyre në bashkëjetesë, transmeton albinfo.ch.

Sipas propozimit të mbështetur nga Komisioni për Çështje Ekonomike dhe Monetare, humbjet vjetore për buxhetin do të jenë rreth 600 milionë franga zvicerane – më të ulëta se versioni fillestar i propozuar nga Këshilli Federal (870 milionë franga).

Një pakicë e udhëhequr nga Leo Müller (Qendra/LU) preferonte variantin e Këshillit Federal, por u mposht me 101 vota kundër 95. Beat Walti (FDP/ZH) e mbështeti tatimin individual duke theksuar se ai krijon stimuj për punësim dhe nxit përfshirjen në tregun e punës.

Franziska Ryser (Të Gjelbrit/SG) shtoi se diferenca në fitues dhe humbës është e kufizuar – “është vetëm një kartëmonedhë 50-frankëshe.” Presidentja Federale, Karin Keller-Sutter, e pranoi se ndryshimi sjell përfitues dhe humbës, dhe se “një reformë e tillë nuk vjen pa kosto.”

Céline Widmer (SP/ZH) kujtoi se Gjykata Federale kishte shpallur “dënimin e martesës” si antikushtetues që në vitin 1984. Tatimi individual shihet si një hap drejt barazisë së mundësive.

SVP dhe Partia e Qendrës e kundërshtojnë reformën. Ata argumentojnë se ajo mund të dëmtojë familjet me role tradicionale gjinore dhe theksojnë kostot e larta të rindërtimit të sistemit tatimor.

Refuzimi i transferimit të zbritjeve për fëmijët:

Këshilli Kombëtar, me 130 vota pro dhe 66 kundër, refuzoi mundësinë që zbritjet për fëmijët të transferohen nga një prind tek tjetri – duke ruajtur barazinë për çiftet me të ardhura të pabarabarta ose me një të ardhur të vetme.

SVP kërkoi ndjekjen e qëndrimit të Këshillit të Shteteve, që përfshinte këtë mundësi në projekt, por pa sukses.

Këshilli i Shteteve do të vendosë për këtë çështje gjatë sesionit veror në qershor.

 

---