Kërkohet largimi i barrikadave në veri

Ndihmës Sekretari i Shtetit, Thomas Countryman, ka folur për zhvillimet e fundit në veri të Kosovës duke i ofruar mbështetje Qeverisë së Kosovës në mbrojtjen e sovranitetit të vendit, të njohur edhe ndërkombëtarisht.

Ai ka thënë se “SHBA-ja është kundër ndarjes së Kosovës dhe kjo çështje tashmë e njohur dhe as që do të diskutohet apo të jetë pjesë e bisedave mes Kosovës dhe Serbisë”. Më tej ai ka kritikuar Beogradin e veçmas disa zyrtarë të lartë që kanë pretendime për shtruarjen e idesë së ndarjes së Kosovës.

Countryman duke folur për RTK-në, ka kritikuar edhe qeverinë për aksionin në Veri që sipas tij u zhvillua pa konsultim. Megjithatë kërkoi që mosmarrëveshjet të zgjidhen nëpërmjet rrugëve paqësore ndërmjet të dyja vendeve dhe serbët t’i largojnë barrikadat.

“Barrikadat duhet të hiqen sa më shpejt. KFOR-i dhe EULEX-i nuk bën të pengohen nga askush në kryerjen e misioneve dhe detyrave të tyre. Është e papranueshme për SHBA-në që KFOR-i apo EULEX-i të konsiderohen armiq të Kosovës apo Serbisë” ka thënë Countryman.

Ndërkohë, Këshilli i Sigurimit i OKB-së, më 24 gusht do të diskutojë për situatën në Kosovë, përfshirë edhe rrethanat e fundit të krijuar në veri të Kosovës. Në këtë mbledhje, siç njoftohet në faqen zyrtare të OKB-së, do të diskutohet raporti i rregullt tremujor i Sekretarit të përgjithshëm të OKB-së, Ban Ki Moon rreth situatës në Kosovë.